Cavaliers mibuntog sa Dallas

CEBU, Philippines - Nangayo pa og overtime ang  Cleveland Cavaliers una nila maangkon ang makutas ug kulbahinam nga kadaugan batok sa Dallas Mavericks, 110-107 sa nagpadayong duwa sa National Basketball Association kagahapon didto sa  American Airlines Center sa Dallas, Texas.

Miburak og 27 puntos si LeBron James, lakip ang go-ahead lay-up  sa nahabiling uno minuto sa overtime aron pangulohan ang opensa sa Cavs. 

Ang Cavs nabiyaan unta og sayo sa Mavs, 7-23, apan ang yawi sa ilang kadaugan mao ang three-pointer ni Kyrie Irving sa nahabiling 13 segundos  nga maoy ilang ikawalong sunod-sunod nga daog.

Sa wala pa mobalitok ang hangin pabor sa Cavs, naglisud una sa pagpasulod sa ilang mga tirada silang Irving ug Kevin Love.

Daw didto unta maputol ang winning streak sa Cavs didto sa Dallas tungod kay kanunay naglabaw ang Mavs, apan dihang naghinapos na ang oras sa duwa, misipyat ang beteranong si Dirk Nowitzki sa iyang katapusang tirada.

Makaiskor unta si Nowitzki niadtong higayona, apan ang guwardiya sa Cavs nga si Iman Shumpert maayo kaayong nakadepensa  kaniya.

Ang kulbahinam nga fourth quarter naglambigit og 10 ka lead changes ug tulo ka deadlocks sa nahabiling dos minutos.

Ang Cavs maoy nag-una karon sa Eastern Conference standings sa ilang  27-9.

Didto sa Minneapolis, gipakita ni Kevin Durant kun unsa siya kamahinungdanon alang sa Oklahoma City Thunder human siya mipadahunog og 30 puntos aron pangulohan ang iyang team ngadto  sa 101-96 nga kadaugan batok sa Minnesota Timberwolves.

Si Durant nagpabuhagay og  12 puntos sa katapusang tres minutos aron baswaton ang Thunder ug ingon man maangkon ang ikatulong best record sa Western Conference sa ilang 27-12 nga baraha sunod sa Golden State  Warriors ug sa San Antonio Spurs.

Si Russell Westbrook mipabuto’g 22 puntos uban ang 11 ka assists ug pito ka rebounds alang sa Thunder.

Ang Timberwolves gipangulohan ni Andrew Wiggins, kinsa miposa og 22 puntos.

Sa laing aksiyon, giinat sa San Antonio Spurs ang ilang winning streak ngadto sa siyam ka duwa human sa  31-point performance ni Tony Parker aron maoy mangu sa ilang 109-99 nga kadaugan batok sa Detroit Pistons didto sa the Palace of Auburn Hills arena.

Si LaMarcus Aldridge midugang og 22 uban ang 13 ka rebounds, samtang si Manu Ginobili mitampo’g 15 puntos  alang sa Spurs, kinsa adunay 34-6 nga baraha. Ang beterano  nga si Tim Duncan miposa og 14 puntos ug si Boris Diaw miamot og 12 puntos (BANAT NEWS)