2016 Cebu City Marathon mosikad na
CEBU, Philippines – Dul-an sa 4,000 ka runners ang magginukdanay sa kadalanan sayo karong buntag gumikan kay ang 2016 nga edisyon sa tinuig nga Cebu City Marathon mosikad na diha sa Cebu IT Park sa Barangay Apas, dakbayan sa Sugbo.
Miabot na ngadto sa 3,800 ang kompirmadong entrante sa pagsulat ning balita kagahapon, apan gipangagpas nga modaghan pa kini gumikan kay ang mga organizers modawat pa man og on-site registration sa tanang mga kategoriya.
Gatosan ka mga langyaw gikan sa 36 ka nasud ang modugang og kahayag sa maong lumba. Gawas sa gikahadlokang mga Kenyans, ang mga nasud nga dunay labing daghan nga mga partisipante mao ang Germany(13), Malaysia (18), America (16) ug Japan (22).
Duna sa’y mga managan gikan sa Croatia, Belgium, Ireland, Italy, Kazakhstan, Singapore, American Samoa, Australia, Canada, Denmark, India, Sweden, United Kingdom ug France.
Gawas sa full marathon, laing kategoriya nga kumbatihan mao ang 21K ug 5K alang sa mga beginners.
Kadtong modagan ubos sa full marathon dunay cut-off time nga pito ka oras, sa 21K upat ka oras ug sa 5K usa ka oras ug 30 minutos.
Ganting salapi ug maanindot nga give-aways ang iapud-apod ngadto sa mga mananaog. (BANAT NEWS)
- Latest
