Spurs, 21-0 na sa homecourt

CEBU, Philippines - Mitali og season-high 18 puntos ang beteranong sentro nga si Tim Duncan  nga maoy nangu sa walo ka players nga  miiskor og double-figures alang sa San Antonio Spurs nga milubong sa Utah Jazz 123-98 aron magpabiling walay pilde sa 21 ka duwa sa ilang korte didto sa AT&T Center sa San Antonio, Texas.

Ang 123 puntos nga kadaugan sa Spurs  mitabla sa ilang labing daku nga iskor karon nga season nga mao sab ang ilang final score batok sa Milwaukee Bucks.

Si Duncan, kinsa wala makapuntos sa   katapusan nilang homegame nga maoy unang hitabo  sa iyang 18 ka tuig nga  NBA career, maoy mihimo sa mga uwahing puntos alang sa Spurs human siya moiskor og otso puntos sa first quarter.

Siya maoy mitubos kang LaMarcus Aldridge, kinsa gipapahuway lang una. Wala sab moduwa si  Tony Parker, kinsa may sakit sa hawak.

Ang maong kadaugan maoy nag-inat sa Spurs ngadto sa 21 ka daog sa ilang homecourt.

Milanat na ngadto sa 30 ka daog sa regular-season didto sa ilang homecourt ang Spurs kun ilakip ang ilang mga daog sa miaging season.

Sa laing duwa, si   Bosnian forward nga si Mirza Teletovic mipauwan og lima ka three-pointers aron pangulohan ang Phoenix Suns nga mipakaging sa Charlotte Hornets sa iskor nga111-102 didto sa U.S. Airways Center sa Phoenix, Arizona.

Mihimo og kinatibuk-ang 19 ka three-pointers ang Suns, kinsa miputol sa ilang nine-game losing streak.

Si Teletovic miiskor og 19 puntos, samtang si Brandon Knight midugang og 18 puntos alang sa Suns nga mihatag sa ilang coach nga si Jeff Hornacek sa iyang ika-100 nga coaching victory.

Midaog sab ang Denver Nuggets batok sa MinnesotaTimberwolves 78-74 pinaagi sa 20 puntos ni Danilo Gallinari. 

Nabugto sa New York Knicks ang ilang walo ka pilde batok sa Miami Heat pinaagi sa ilang 98-90 nga kadaugan  ubos sa pagpangulo ni Carmelo Anthony nga mibahog og 25 puntos.

Sa lain pang mga duwa,  ang Los Angeles  Clippers mipilde sa Portland TrailBlazers, 109-08,  ang Indiana Pacers midaog sa Orlando Magic, 98-90, ang Detroit Pistons mipukan sa Boston Celtics, 99-94.

Gilubong sa Toronto Raptors ang Brooklyn Nets, 91-74,  samtang gilubong sab sa Oklahoma City Thunder ang Memphis Grizzlies, 112-94 ug ang Dallas Mavericks miihaw  sa New Orleans Pelicans, 100-91  (BANAT PALARO)