Bahandi, eleksiyon dili makasamok ni Pacquiao
CEBU, Philippines – Si Pinoy ring superstar Manny Pacquiao mibulsa og makabungog nga $150 million (P7 billion) sa ilang superfight ni Floyd Mayweather, Jr. sa miaging tuig ug sa kasamtangan, sud sa iyang huna-huna mao ang eleksiyon gumikan kay magpapili man siya pagka-Senador sa Pilipinas sa bugnong lugaynon karong Mayo 9.
Apan gipaneguro ni trainer Freddie Roach nga ang bahandi ug eleksiyon dili makasamok ni Pacquiao sa pagpangandam unya sa iyang boksingero alang sa ikatulo niining away batok ni WBO welterweight champion Tim Bradley karong Abril 9 didto sa MGM Grand sa Las Vegas.
Matud pa ni Roach nga kompiyansa kaayo siya nga sakto ang mamahimong dagan sa preparasyon ni Pacquiao gumikan kay kun makasud na gani kini sa boxing gym, sayud man siya nga seryoso na si Pacman ug bugtong huna-huna niini nakasentro lamang sa boksing ug wala nay lain pa.
“One thing about Manny Pacquiao is once he walks in the boxing gym, all that other stuff goes away,” dason pa ni Freddie Roach ngadto ni Lance Pugmire sa Los Angeles Times. “He’s always dedicated, always works very hard, and I don’t think that will change. Once he’s in the gym, he knows what he’s there for. It’s still what he does best, and he knows that.”
Misyon ni Pacquiao (57-6-2, 38KOs) mao ang pagpamatuod nga hingpit nang na-ayo ang wala niyang abaga sa iyang pakigsangka batok ni Bradley (33-1-1, 13KOs), ang boksidor nga iyang gikulata duha ka higayon bisan tuod og kontrobersiyal kaayong midaog si Bradley sa una nilang engkuwentro.
Ang 37-anyos nga si Pacquiao nagparamdam nang daan nga lagmit mao na kini ang katapusan niyang away, apan andam siyang dili dayonon ang plano niyang pag-retiro ilabi na kun mahatagan og katumanan ang gihandum niyang rematch batok ni Mayweather. (BANAT NEWS)
- Latest
