Ritchie, tawing MVPs sa 2nd Sunday.Com Caging

CEBU, Philippines – Si Ritchie Malahos sa team Alitz ug si Tawing Grafe sa Bulldogs maoy nangu sa individual awardees sa Sunday.com  second conference basketball tournament atol sa  ilang awarding ceremony ug Christmas party niadtong Disyembre 27 didto sa Meritz resort sa Barangay Pagsabungan, Mandaue City.

Si Malahos maoy misakmit sa finals MVP trophy, samtang si Grafe mao sab ang milangkat sa season MVP title.

Ang Mythical Five gilangkuban nilang James Latonio sa Astroboy, Ilan Saludares sa Dota, Ray Neiz sa Mustang, Allan Bacus sa Bulldogs ug Robert Neri sa Alitz.

Si Mac Nadera sa champion team Alitz mikawat sab og atensiyon human siya ang napili isip ‘defensive player’ alang sa special award.

Laing nakadawat og special award mao sila si Lyndon Ancajas sa Astro (most improve player) ug ang  tulo ka magduduwa sa Tomahawk nga sila si Michael Abrenica (3-point king), Juven Reynante (sportsmanship) ug Ben Auman (best photo).

Gawas sa individual award, ang tanang mga magduduwa sa champion team Alitz ug Bulldogs tagsa-tagsa sab nga gisab-itan og medalya.

Ang liga nagmalampuson tungod sa mga paningkamot sa aktibo  ug kugihan nga presidente nga si Tata Nadera ug sa kauban niyang mga opisyales nga sila Edward Pepito (vice president), Lorena Nadera (secretary/treasurer) ug  sa  board of directors nga sila si Jojo Carba, Chael Ygot, Dodoy Grafe, Cyril Gulbin ug Ankie Antigua ug ingon man ni Atty. Sally Malig-on isip adviser.

Nagmalampuson sab ang liga tungod sa walay hunong nga pagsuporta sa Visayan Electric Company (VECO) ug  ni Mandaue City Mayor Jonas Cortes.  (BANAT NEWS)