Clippers mikaging sa Thunder

CEBU, Philippines – Nakabawi dayon ang Oklahoma City Thunder  human nila patapsingi ang Los Angeles Clippers, 100-99 sa duwa nila sa NBA kagahapon didto sa Staples Center sa Los Angeles, California.

Si Russell Westbrook maoy nangu sa Thunder  nga mipadahunog og 33 puntos, samtang si Kevin Durant mipahaguros og 24 puntos  ug si Serge Ibaka  midugang og 17 puntos.

Mao na kadto  ang ika-11 nga daog sa Thunder sa miaging 14 nila ka duwa.

Si Chris Paul mao usab ang nangu sa Clippers pinaagi sa iyang 32 puntos uban sa 10 ka assists.

Silang Blake Griffin ug J.J. Redick parehong miamot og 15 puntos alang sa Clippers nga napilde na karon og tulo ka sagunson nga duwa.

Naglabaw unta ang Clippers, 83-75 human sa  basket ni Cole Aldrich sa nahabiling 10:35  sa   fourth quarter.

Tulo una ka higayon nga gitabla sa Thunder ang duwa ug ang  katapusan sa iskor, 93-all sa basket ni Ibaka nga may 3:13 ang nahibiling oras sa duwa.

Ang basket ni Griffin maoy naghatag pagbalik og labaw sa Clippers sa katapusang uno minuto, apan milabaw pag-usab ang Thunder  human sa three-pointer ni Westbrook, 96-95  sa nahabiling 48.8 segundos ang oras.

Mihimo og dunk si Griffin aron hatagan ang Clippers og 99-98 sa daginutong segundos, apan mibawos si Durant aron luwason ang Thunder.

Sa laing mga duwa, ang Washington Wizards midaog batok sa Sacramento Kings, 113-99,  midaog sab ang Boston Celtics batok sa Minnesota Timberwolves sa mao gihapon nga iskor 113-99.

Ang Orlando Magic mipukan sa New York Knicks, 107-99, ang Atlanta Hawks midagit sa Portland TrailBlazers 106-97.

Ang Brooklyn Nets miihaw sa Chicago Bulls, 105-100, ang Houston Rockets midaog sa Charlotte Hornets, 102-95, ang San Antonio Spurs midaog batok sa Indiana Pacers, 106-92 ug ang Utah Jazz milubong sa Phoenix Suns, 110-89. (BANAT NEWS)