Arcilla, Anasta sa Dagitab tennis final

CEBU, Philippines – Si Johnny Arcilla miladlad sa karaan niyang labok aron pagbuntog sa iyang doubles partner nga si Ronald Joven ug ingon pag-abante sa finals sa Palawan Pawnshop-Dagitab Festival Open Tennis Tournament kagahapon didto sa Naga Tennis Club.

Gibihag ni Arcilla si Joven sud sa duha ka sets, 6-3, 6-4, aron pag-angkon og katungod nga sangkaon sa kampiyonato sa men's open division si Onyok Anasta, nga miposte sa labing makapakugang nga daog sa torneyo human niyang gitagak  ang topseed nga si Patrick John Tierro.

Dominante kaayo si Anasta sa pagdemolis niini sa No.1 player sa nasud. Human giserohan ang iyang kontra sa unang set, 6-0, dili kapugngan ang kainit ni Anasta kay miposte kini og 5-2 nga labaw sa ikaduhang set hinungdan sa pagsurender na lang ni Tierro.

Sa final, seguradong dumot nga engkuwentro ang mahitabo kay si Anasta naglaraw nga makabawos ni Arcilla nga mipilde kaniya sa usa ka dakong torneyo didto sa Davao sa miaging bulan. (BANAT NEWS)