Abadia ug Soquiño abante sa Dagitab netfest
CEBU, Philippines – Ang kanhi varsity sa University of San Jose-Recoletos nga si Kennex Abadia ug ang kababayan niining Sugbuanon nga si Janji Soquiño miabante ngadto sa round of 16 sa Palawan Pawnshop-presented Dagitab Festival Open Tennis Championships didto sa Naga Tennis Club kagahapon.
Midaog si Abadia human miretiro ang Ilongo niining kontra nga si Luke Flores, samtang si Soquiño wala paningta bisan og usa ka lugas gumikan kay wala mobutho ang iyang kontra nga si Kevin Pantillo.
Sa dihang nagtabla, 1-1, human sa duha ka sets, si Flores kalit lang nga miretiro sa dihang si Abadia naglabaw, 3-0.
Wala hinuo’y suwerte ang laing pambato sa Sugbo nga sila si Franklin Encarnacion, Marc Enriquez ug Venz Alforque. Si Encarnacion gipilde ni Deo Talatayod, 4-6, 6-3, 6-1, si Enriquez miyukbo ngadto ni Fritz Verdad, samtang ang garbo sa Naga nga si Alforque nahagba sa mga kamot ni Arvin Ruel, 6-4, 6-0.
Sa laing bahin, ang doubles event banatan karong adlawa diin sila si Johnny Arcilla ug Ronard Joven maoy topseed sa 16 ka mga contenders.
- Latest
- Trending
