CEBU, Philippines – Makapahimus ang Talk ‘N Text Tropang Texters og ‘twice-to-beat’ advantage sa pagsugod sa quarterfinals human sila mipahiluna sa dapit sa standing pagtapos sa ilang kampaniya sa elimination round.
Ang Tropang Texters milampos pagdaog batok sa GlobalPort Batang Pier, 107-96 kagabii didto sa Smart Araneta Coliseum.
Labaw og nuybe puntos sa halftime, 53-44, ang Texters mipakita og init nga opensa batok sa GlobalPort bisan pa og wala makaduwa ang No.1 pick nga si Moala Tautuaa, kinsa adunay gihambin nga angol.
Mibida hinuon ang laing top rookie sa Texters nga si Troy Rosario, kinsa nakigtambayayong ni Jayson Castro aron moposte’g 83-69 nga bentaha paingon sa final period.
Mi-rally ang Batang Pier sa makadaghang higayon ubos sa pagpangulo ni Terrence Romeo, apan kanunay silang tubagon sa mga tirador sa Texters nga sila si Castro ug Larry Fonacier.
Ang Talk ‘N Text (6-4) gipangulohan ni Castro nga adunay 25 puntos, samtang si Rosario mirehistro og 19 puntos ug milangkat og pito ka rebounds.
Parehong mihimo og 24 puntos sila si Romeo ug Stanley Pringle alang sa GlobalPort nga adunay 7-4 win-loss record.