Cyrus vs. Allan K. SA Finals
CEBU, Philippines - Nakasud gyud sa finals ang team Cyrus dihang ilang gilubong ang Royal Majesty, 60-41 sa crossover semifinals sa Dayon Basketball Club Christmas League 2015 niadtong Biyernes didto sa Sacred Heart School old campus gym sa Gen. Maxilom Ave., Cebu City.
Ang maong kadaugan gipangulohan ni Rafael Oliver, kinsa mikamada’g 19 puntos, samtang ang Royal Majesty gipangulohan sab ni Villadelgado sa iyang 13 puntos. Sa maong kadaugan, ang Cyrus maoy nakakuha og katungod sa pakigsangka sa Allan K. Enterprises nga unang miabante sa finals human sab nila gipilde ang Cebu Wetland Resort, 74-63.
Si John Louis maoy nangu sa Allan K. Enterprises nga mipabuhagay og 13 puntos. Mikawat sab og salida silang Nonoy Hipos ug Jayme Iligan nga miambit og 12 ug 10 puntos.
Sila si Sampang ug Villarba mao sab ang nangu sa natagak nga Cebu Wetland Resort nga nagkumboya’g 25 puntos.
Dili hinuon sayon ang giagian sa Cyrus kay mipaubos pa kini sa ‘knockout’ match tali sa Imprimis diin midaog sila, 58-51 sa pagpangulo nilang Oliver ug Reggie Jared nga parehong miantog og 11 puntos ning maong torneyo nga gipadagan ni Dayon president Allan Abella inabagan ni Jepo Abella. Gisuportahan sab kini sa tanang miyembro sa Dayon ballclub. (BANAT PALARO)
- Latest
