Warriors gisungag sa Tamaraws

CEBU, Philippines - Natapos na ang gihimong pagratsada sa University of San Carlos (USC) Warriors batok sa tadhang mga Manila teams human  sila mahagba sa kamot sa UAAP champion Far Eastern University  (FEU) Tamaraws sa 2015 PCCL National Collegiate Championship diin duha ka koponan ang gikoronahang kampiyon.

 Ang Tamaraws ni coach Nash Racela gideklara nga co-champions uban sa San Beda Red Lions, nga nanimawos batok sa ilang karibal sa NCAA nga Letran Knights, 94-72 sa unang duwa kagahapon didto sa The Arena sa San Juan City.

Ang Warriors mipakita og maayong birada sa sinugdanan  human yano nilang gipapas ang otso puntos nga alkanse sa unang kuwarter, 16-24. Gani nakalabaw pa sila, 45-44, human sa free throw ni Espoir Toyambi sa nahabilin nga 3:54 sa ikatulong kuwarter.

Apan mao na kadto ang labing nindot nilang nahimo human ang Tamaraws milusad og 13-4 run aron moposte og otso puntos nga labaw, 57-49, sa  nahabiling 10 minutos sa duwa,

Katapusang nakasikit ang Warriors sa iskor nga 55-all gumikan kay ang Tamaraws mipatuasik na sab og mainit nga 13-3 rally aron paglansang sa kinadak-an nilang labaw, 70-58 sa nahibilin nga 4:40 sa duwa.

Mibawos pa ang Warriors, apan igo lamang kini nakasikit sa iskor nga 77-81 gumikan kay dili man pabor kanila ang oras.

Bisan pa man sa ilang kapildihan, mapasigarbuhon gihapon ang Warriors gumikan kay gawas nga mibulsa og P500,000 nga premyo, ila sab nga natablahan ang labing nindot nga nakab-ot sa usa ka Cebu team sa maong torneyo nga giangkon sa  University of the Visayas (UV) Green Lancers human ma-second sa Ateneo Blue Eagles niadtong tuig 2007. (BANAT PALARO)