CEPCA molusad sa ilang anniversary magazine
CEBU, Philippines - Ang Cebu Executives and Professionals Chess Association (CEPCA) ubos sa liderato ni Engr. Jerry Maratas pormal nga molusad sa ilang Silver Anniversary commemorative magazine karong Domingo diha sa Handuraw Cafe sa Gorordo Avenue, dakbayan sa Sugbo.
Ang maong kalihukan ipahigayon dungan sa grand finals sa tinuig nga torneyo sa CEPCA ug ingon man sa ilang Christmas party ug paghurar sa bag-o nilang mga miyembro.
Giulohan og “Silver Shining, CEPCA@25”, ang 28 ka pahina nga magasin nagladlad sa maanindot nga kaagi sa maong kahugpongan sukad kini mahimugso niadtong tuig 1990.
Gihatagan niini og pagyukbo kadtong mga responsabli sa pagkatukod sa grupo ilabi na silang Engr. Frank ‘Boy’ Pestaño, Atty. Alex Tolentino ug Nicnic Climaco, nga mao na lang ang nahabiling buhi sa 10 ka orihinal nga founding members sa CEPCA.
Gituki sab sa magasin ang mga nakab-ot sa CEPCA, ang ilang mga community outreach projects ug uban pang dalaygon nga mga buhat kansang tuyo ug tumong alang sa pagpalambo ug pag-ugmad sa chess dinhi sa Sugbo ilabi na ngadto sa mga kabatan-onan.
Sa laing bahin, andam na ang tanan alang sa “CEPCA Battle of Champions” nga kumbatihan sa dili pa ang paglusad sa magasin.
Mobanat sa group A mao sila si two-time grand champion Jimmy Ty Jr., Rey Flores, Arnold Cadiz, Tony Cabibil, Amado Olea Jr., Carlo Maraat, Stein Torres, Jojo Muralla, Peterson Sia, Rogelio Enriquez, Ross Yamyamin ug Martin Kwan sa group A.
Samtang magsangka sa group B mao sila si Regelito Hortelano, Ruel Hortelano, Jun Kidlat, Elmer Odango, Jerry Maratas, Felix Balbona, Mike Tinga, Jojo Paredes, Jessa Balbona, Michael Ventulan, Edwin Cablao ug Romy Pialan. (BANAT PALARO)
- Latest
