Iesieken ‘Grandslam’ sa Triple-A tourney

CEBU, Philippines – Mahimayaon ang Domingo sa team Iesieken gumikan kay ilang  natugkad ang kinatumyang bahin sa ilang misyon.

Ang Iesieken mihimo og kasaysayan sa Triple-A (Allied Athletic Association) isip labing unang team nga na-grandslam sukad natukod ang liga niadtong 1979.

Nidaog ang Iesieken sa higpit ug kulbahinam nga finals batok sa team Allied, 67-62 niadtong Domingo didto sa Kimwa gym, sa Barangay Subangdaku, Mandaue City.

Ang troika nilang Mai  Suson, Orly Navarro ug Robert Cuerbo maoy responsabli sa talagsaong kalampusan sa Iesieken nga parehong mihimo’g double figures.

Giharian gihapon ni Mai Suson ang opensa sa Iesieken nga mipahaguros og 19 puntos, uban ang 11 ka rebounds ug duha ka block shots nga igo na kaayo alang kaniya aron ilhon isip   MVP.

Si Navarro mitusak og 13 puntos,  lakip ang iyang crucial 3-pointer nga maoy mihaw-as sa Iesieken gikan sa kangitngit ngadto sa kahayag, samtang si Cuerbo miambit og 10 puntos ug lima ka rebounds.

Abante og 10 puntos ang Allied, 43-33 sa sayong bahin sa third period, apan ang Iesieken ni playing coach Dandy Tagalog mihimo’g 13-4 run aron makan-an ang labaw ngadto na lang sa usa ka lugas, 46-47 sa nahabiling 1:49 sa maong kuwarter.

Human molabaw, 50-49  sa final period, nagmabinantayon na ang Iesieken hangtod na sa katapusang pitik sa orasan.

Si Gilbert Lesin maoy nangu sa Allied nga miburak og 14 puntos, samtang si Barak Recto mitampo’g 10 puntos.

Sa duwa alang sa ikatulong dapit, ang Gilas D’ Boys mipukan sa Limasawa, 57-49 sa pagpangulo nilang Rechel Bamba  nga miposa’g 17 puntos ug Rex Gonzaga nga adunay 14 puntos.

Sila si Bamba ug Gonzaga pareho nga mihimo og walo ka rebounds.

Si SPO2 Junjun Sabang mao sab ang migiya sa Limasawa sa iyang 13 puntos, gisundan ni Gerjam Armamento nga adunay 10 puntos.

Ang liga nahimong posible pinaagi sa paningkamot ni Triple-A presidente Gilbert Lesin sa abag  nilang  league commissioners  Jun Arceo ug Cris ‘Crismart’ Martinito ug sa tanang miyembro sa maong ballclub ug ingon man nilang Chigie Gesulga, Arman Gonzaga, Jogonz Gonzaga, Rabi Arandoga ug Bardon Marcos. sa CEBRA.

Puntos Matag Usa

Unang duwa:

GILAS (57) – Bamba 17, R. Gonzaga 14, Estremos 8, Chavez 8, A. Gonzaga 4, Baclay 2, Balagon 2, Dakay 2.

LIMASAWA (49) – Sabang 13, G. Armamento 10, Ecot 8, Ontong 6, Cabucos 4, Cabahug 2, Armamento 2, Cardoza 2.

Ikaduhang duwa:

IESIEKEN (67) – Suson 19, Navarro 13, Cuerbo 10, Gokotano 6, Montalban 6, Abong 4, Grafe 4, Arche 2, Tagalog 2, Almario 1.

ALLIED (62) – Lesin 14, Recto 10, Madrid 6, Budiongan 5, Cabahug 4, Secad 4, Catinoy 2, Retiza 2, Ygoña 2, Ocier 2, Yatan 2, Mendoza 2, Crismart 2, Lugas 2. (BANAT NEWS)