Romeo misalida sa Batang Pier
CEBU, Philippines – Ang eksplosibo niyang dinuwaan batok sa Meralco Bolts ug Mahindra Enforcers maoy nagtuboy kang Terrence Romeo sa GlobalPort Batang Pier sa labing una niyang pasidungog isip Accel-PBA Press Corps Player of the Week ning ika-41 nga season sa PBA.
Si Romeo mipakita nga usa siya sa labing tadhan nga point guard sa liga human iyang giwani si Jimmy Alapag sa Meralco atol sa ilang 108-104 nga kadaugan niadtong Disyembre 9.
Ang Most Improved Player sa miaging season nagmangtas og maayo sa katapusang kuwarter diin siya miratsada og 12 sa iyang 33 puntos aron pagselyado sa kadaugan sa GlobalPort.
Upat ka adlaw ang milabay, misalida na sab si Romeo. Bisan tuod og mikagar ang iyang outside shooting, apan milansang siya sa bugtong ug importante niyang 3-pointer. Iya kining gisundan pinaagi sa pag-iskor sa usa ka maanindot nga crossover move aron pag-aswat sa GlobalPort ngadto sa 118-116 nga kadaugan batok sa Mahindra sud sa overtime.
Ang maong daog nagduso sa GlobalPort ngadto sa ikaupat nga puwesto bitbit ang 7-3 win-loss record nga nakahatag kanila og twice-to-beat incentive sa quarterfinals.
Sa kinatibuk-an, si Romeo mi-average og 31 puntos, 6.5 rebounds ug 4.0 assists sa miaging semana nga igo kaayo aron pagbuntog sa iyang teammate nga si Stanley Pringle ug ingon man nilang Alex Cabagnot sa San Miguel Beer, Carlo Lastimosa sa Blackwater ug Scottie Thompson sa Ginebra alang sa maong senemanang pasidungog. (BANAT NEWS)
- Latest
