UV Lancers batok Uno-R Rams sa 2015 PCCL Vis-Min qualifying
ORMOC CITY, Philippines – Mituhog og unom ka triples si Joshue Segumpan sa kinatibuk-an niyang 20 puntos alang sa University of the Visayas (UV) Green Lancers nga miihaw sa Holy Trinity College (HTC) Wildcats sa General Santos City, 98-75 aron moabante sa finals sa Philippine Collegiate Champions League 2015 National College Championship Vis-Min qualifying games sa miaging gabii dinhi sa Ormoc City Superdome.
Sangkaon sa UV sa finals ang University of Negros Occidental Recoletos (UNOR) Rams sa Bacolod City nga mipukan sa ilang igsuong koponan University of San Jose-Recoletos (USJ-R) Jaguars, 76-71.
Si Segumpan misipyat la’g kausa sa pito niya ka tira gikan sa 3-point arc. Si June Kent Manzo midugang og 14 puntos, samtang ang rookie nga si Christian Bolano, ang produkto sa Linao National High School sa Ormoc mihimo’g singko puntos sa iyang debut.
Sa laing duwa, ang Rams mipatuman sa ilang hugot nga depensa ug sayo nilang naunhan ang Jaguars aron moiskor og singko puntos nga kadaugan.
Nakasikit unta ang Jaguars sa nahabiling 33.6 segundos human sa basket ni Ricky Dyn Peromingan, 70-71, apan nakahimo sab og split charities ang Rams, 72-70. Duna pa unta’y purohan nga mahatod sa Jaguars ang duwa sa overtime, apan nailog ang return pass ni Kevin Villafranca ngadto kang Ralph Dinolan sa ilang two-man play ug didto mapawong ang ilang tinguha nga mohimo unta’g all-Cebu finals. (BANAT NEWS)
- Latest
