Warriors daog gihapon
CEBU, Philippines - Mirehistro og season-high 39 puntos si Klay Thompson, samtang ang reigning MVP nga si Stephen Curry mitira og 29 puntos aron pangulohan ang defending champion Golden State Warriors sa 131-123 nga kadaugan batok sa Indiana Pacers sa National Basketball Association kagahapon didto sa Bankers Life Fieldhouse sa Indianapolis, Indiana.
Ang Warriors wala pa gihapon mapilde sa 23 nila ka duwa sukad sa pagsugod niini nga season nga maoy best record sa kasaysayan sa ilang prangkisa.
Kun apilon og kuwenta ang ilang daog sa miaging season, ang Warriors aduna na’y 27 game winning-streak nga mitabla kanila sa Miami Heat nga ikaduhang longest winning streak sa kasaysayan sa NBA.
Si Thompson igo lang mihimo og 10 puntos sa first half, apan nanginit siya sa second half ilabi na sa final period aron tabangan ang Warriors nga moposte’g 28 puntos nga labaw.
Ang Warriors mangahas pag-inat sa ilang limpiyong rekord ngadto sa 24-0 batok sa Boston Celtics karong Sabado.
Nangulo sa Pacers mao si Paul George, kinsa miposa og 33 puntos.
Didto sa Quicken Loans Arena sa Cleveland, Ohio, ang Cavaliers nakaipsot sa Portland TrailBlazers, 105-100 sa pagpangulo ni LeBron James, kinsa mipabuhagay og 33 puntos ug milangkat og 10 ka rebounds.
Sa laing mga duwa, ang Brooklyn Nets mibitik sa Houston Rockets, 110-105 ug ang Oklahoma City Thunder milubong sa Memphis Grizzlies, 125-88. (BANAT NEWS)
- Latest
