Panthers mibihag sa Warriors

CEBU, Philippines – Gipakauwawan sa University of Southern Philippines Foundation (USPF)  Panthers  ang  2015 CESAFI champion University of San Carlos (USC) Warriors pinaagi sa  paglubong, 74-61 sa 1st Asia Pacific University Games (APUG) kagahapon didto sa ilang gym sa Lahug, siyudad sa Sugbo. 

Gipangulohan ni Ayn Obenza ang Panthers pinaagi sa iyang 18 puntos, samtang si Carl Langahin miamot og 17 puntos.

Ang makapaisa sa kilay nga kadaugan maoy ikaduhang upset kagahapon kay sa sayo pa, napilde sab ang Warriors batok sa University of Cebu Webmasters, 65-73 nga naghatag ni rookie coach Kenneth Kern Sesante og daku’g purohan nga mokampiyon human nila gipilde ang mas tag-as nga Malaysians gikan sa Universiti Tecknologi-Mara, 66-61.

Ang Panthers nakabawi human mapilde ngadto sa Nippon Sports Science University (NSSU)  Lions sa Japan, 71-74.  

Si Ian Ortega miiskor og 11 puntos alang sa Warriors, samtang ang bigmen nga silang Charles Pepito ug Willaim McAloney parehong adunay nuybe puntos ug si Nico Magat miamot og siyete puntos. 

Human mapilde sa ilang unang duwa batok sa NSSU, ang UC migamit sa ilang solidong depensa pagpugong sa Malaysians hinungdan nga  nakahimo kini og daghang turnovers. 

Si Garciano Puerto Jr. maoy nangu sa Webmasters sa iyang 15 puntos ug   ang rookie guard nga si  Gelain Delator  adunay 11 puntos alang sa UC. 

Sa badminton team event nga giduwa didto sa Metro Sports Club, ang  Cebu Institute of Technology-University  (CIT-U)  nga gibitoonan nilang Stephanie Tabayocyoc, Connie Jay Caralio ug Vida Falla Gamboa  miharos sa Malaysia, 2-0 aron sakmiton ang kampiyonato ubos sa women’s division. (BANAT NEWS)