Limasawa, Gilas sud semis
CEBU, Philippines - Gipangpilde sa Limasawa ug sa Gilas D’ Boys ang tagsa-tagsa nilang karibal aron moabante sa semifinals sa Triple-A Christmas League 2015 basketball tournament niadtong Domingo didto sa Kimwa gym sa Barangay Subangdaku, Mandaue City.
Ang Limasawa yano kaayong nakasud sa semis kay ilang gilubong ang Triple-A, 61-44, samtang ang Gilas mipilde sa Gallego, 71-63.
Mipatuasik og 13 puntos si Gerjam Armamento aron maoy mangu sa Limasawa nga miarangkada dayon sa pagsugod aron morehistro og 14-9 paghuman sa first period.
Ang playing coach nga si Redyn Villaronza ug si Anton Ontong mihipos og 10 puntos matag usa.
Si Jimmy Monternel mao lang ang nakaiskor og double figures alang sa Triple-A nga mikamada’g 12 puntos.
Sa laing bahin, si Rex Gonzaga misalida og maayo aron moiskor og 20 puntos ug ingon man pangulohan ang Gilas.
Miarte sab si Opong Englis, kinsa mitimang og 13 puntos, samtang sila si Rechel Bamba ug Aldrin Gonzaga mitimbre’g 12 ug 10 puntos aron tabangan ang Gilas ni playing coach Jason Pestaño nga moabante sa semis.
Ang semifinals himuon karong Domingo diin magsangka sa unang duwa ang Iesieken batok sa Limasawa, sundan sa lahugay tali sa Allied ug Gilas. Ang mga modaog maoy magpinaksitay sa knockout finals.
Ang liga gipasiugdahan sa Allied Athletic Association kon Triple-A ubos sa bendisyon sa ilang presidente nga si Gilbert Lesin. Ang mga duwa gipadagan nilang league commissioners Jun Arceo ug Cris Martinito inabagan ni Orly Navarro ug ingon man nilang Chang Tejero, Chigie Gesulga, Arman Gonzaga ug Kenneth Ypanto.
Puntos matag usa
Unang duwa:
LIMASAWA (61) – Armamento 13, Villaronza 10, Ontong 10, Sabang 8, Gogo 8, Palero 7, Yares 4, Cabucos 2.
TRIPLE-A (44) – Monternel 12, Dicdican 8, Bukiron 6, Nova 6, Gulbin 4, Lurica 2, Monterde 2, Romagos 2, Gacasan 2.
Ikaduhang duwa:
GILAS (71) – R. Gonzaga 20, Englis 13, Bamba 12, A. Gonzaga 10, Estremos 8, Baclay 2, Balagon 2, Dakay 2, Limosnero 2.
GALLEGO (63) – Gonzaga 18, Grafe 17, Manatad 13, N. Ybañez 7, Carvajal 6, Soco 2. (BANAT NEWS)
- Latest
