Mga Sugbuanon misalida og maayo sa Bohol cycling

CEBU, Philippines - Ang Sugbuanong mga seklista nga gipangulohan ni Amon Espinosa misalida og maayo sa Stage 1 sa Ride Bohol Cycling Race. 

Ang 16 ka kilometro nga Individual Time Trial (ITT) gipahigayon didto sa lungsod sa Loay, Bohol.

Si Espinosa maoy naghari sa men’s B/C category sa oras nga 24 minutos ug upat ka segundos. Si Harry Jumamoy maoy mipahiluna sa ikaduhang dapit sa oras nga 25:05, samtang si Johnny Ferniz maoy nalandig sa ikatulo sa oras nga 25:10. Ang garbo sa mga Bol-anon nga sila si Roger Torreon (25:53) ug Pio Castro (25:54) maoy miokupar sa nagsunod nga duha ka luna.

Laing pambato sa Sugbo nga si Jonathan Simbajon mitapos sa ikatulong dapit sa men’s golden division nga gidominar ni Philip Sainz sa Ormoc City. Si Sainz mirehistro og oras nga 26:35. Nagsunod  niya ang American national nga si Keith DeFiebre sa oras nga 28:29, samtang si Simbajon mitapos sa oras nga 29:58.

Wala sab magpabitin ang 16-anyos nga Sugbuanang si Ana Patricia Maximo sa YKKBikes.com nga mipakita og maayong labok taliwala sa lig-on nga mga lalaking kontra aron pagpahiluna sa ika-14 nga dapit sa oras nga 33:46. (BANAT NEWS)