Mga Sugbuanon nanghawod sa dancesport
CEBU, Philippines - Ang mga Sugbuanon nangharos sa dancesport event diin ang Team Cebu City ug ang co-host Cebu Province mibira og siyam sa 12 ka bulawan nga posibleng modaog sa 2015 Philippine National Youth Games-Batang Pinoy Championships didto sa Social Hall sa Cebu Provincial Capitol.
Ang TCC milangkat og lima ka golds, tulo ka silvers ug duha ka bronzes, samtang ang Cebu Province mipupo og upat ka golds ug tagsa ka silver ug bronze.
Nangu sa kampanya sa TCC mao sila si Ouie Selene Rendon ug John Lloyd Leyson nga milabnot og duha ka bulawang medalya sa juvenile A standard ug latin category.
Sila si Niño Salve ug Jannah Marie Pugoy miangkon sa juvenile C latin gold, samtang ang TCC mipakyaw sa gold ug silver sa junior A standard pinaagi nilang Gylle Niño Deluvio ug Julia Paz Branzuela ug Lloyd Simon Asuque ug Raylyn Jhea Romeo.
Sila si Emmanuel Corro ug Anndreah Kiem Capangpangan maoy nimina sa ikalimang bulawan sa TCC pinaagi sa junior A latin.
Ang Cebu Province mikuha sa tanan nilang golds sa modern standard pinaagi nilang Nigel John Angel ug Shadelle Niña Hernandez sa juvenile D, Hezekiah Sobrevega ug Frances Mae Valmoria sa juvenile C, Francis Isaia Diluvio ug Kim Jocson sa junior D ug Crispin Sato ug Yeddah Marie Castañares sa junior C.
Sa athletics event sa Cebu City Sports Center, ang Sugbuanon nga si Mary Joy Loberanis maoy naka-gold sa 3,000-meter run sa oras nga 10 minutos ug 57.09 segundos, samtang si Juvan Jane Baculot naka-silver sa triple jump.
Didto sa dakbayan sa Danao, si Aaliyah Ricci Mataragnon sa Team Cebu City naka-gold ug silver sa cycling. Nakabira siya og gold sa girls 14-15 criterium nga naglangkob og 25 kilometros sa oras nga 37 minutos ug 23.37 segundos, samtang ang iyang silver gikan sa individual time trial sa oras nga 18:30:38.
Si Catherine Yu miangkon og bronze sa ITT girls 11-12 age group, samtang didto sa dakbayan sa Mandaue, si Rapha Ellerred Villanueva nakabira og silver sa wrestling ubos sa 32 kgs. division. (BANAT PALARO)
- Latest
