Ariza, Thornton miluwas sa Rockets

CEBU, Philippines - Usa ka three-pointer gikan ni Trevor Ariza sa katapusang 1:14 sa overtime maoy naghatag og labaw sa Houston Rockets ug ang duha ka free throws ni Marcus Thornton  sa himalatyong oras maoy miselyo sa ilang kadaugan batok sa New York Knicks, 116-111 sa National Basketball Association kagahapon didto sa Madison Square Garden sa New York City.

Si James Harden maoy nangu sa Rockets sa iyang 26 puntos,  si Thornton ug si Clint Capela  midugang og 18 puntos matag usa, samtang  si Ariza miamot og 16 puntos.

Si Arron Afflalo mibahog og 31 puntos alang sa Knicks, kinsa niduwa nga wala ang ilang leading scorer nga si Carmelo Anthony. Si Kristaps Porzingis mihimo’g  20 puntos uban sa iyang 13 ka rebounds.

Silang Langston Galloway ug Jose Calderon misipyat sa ilang potential game-tying 3-pointers sa katapusang minuto sa duwa.

Gipapas sa Rockets ang ilang 14 puntos nga biya didto sa fourth quarter ug gitabla kini ni Thornton sa katapusang 32 segundos.

Human magkatabla, 101-all, si Lance Thomas sa Knicks misipyat sa iyang jumpshot ug mao sab si Harden sa Rockets hinungdan sa overtime.

Naglabaw ang Houston, 108-103  sa overtime, apan natabla sa sab gihapon kini sa Knicks sa 111-all  sa nahabiling 1:31 sa duwa sa wala pa ang jumpshot ni Ariza gikan sa three-point arc alang sa 114-111 nga bentaha.

Didto sa Memphis, si Mike Conley mihimo’g 20 puntos aron pangulohan ang Grizzlies ngadto sa 92-84 nga kadaugan batok sa Philadelphia Sixers, kinsa nakaangkon sa ilang ika-18 ka sagunson nga pilde.

Natabla na sa Sixers ang NBA all-time mark sa labing daghang pilde sa pagsugod sa season nga nahimo sa 2009 nga New Jersey Nets.

Mao na kadto ang ika-26 nga sagunson nga pilde sa Sixers, apil na ang miaging season nga maoy labing taas nga kutay nga pilde.

Didto sa Toronto, midaog sab ang Phoenix Suns batok sa Raptors, 107-102 pinaagi sa 17 puntos ug 11 ka assists ni Eric Bledsoe, samtang si DeMar DeRozan maoy nangu sa Raptors sa iyang 29 puntos ug pito ka assists.

Sa laing mga duwa, ang Orlando Magic midaog batok sa Boston Celtics, 110-91 pinangulohan ni Victor Oladipo sa iyang 19 puntos uban ang walo ka rebounds ug unom ka assists. Ang Brooklyn Nets mipukan sa Detroit Pistons, 87-83 ug ang Indiana Pacers midaog batok sa Los Angeles Lakers, 107-103.  (BANAT PALARO)