Sukmagay sa Hoops Dome

CEBU, Philippines – Pakyas  tuod  siya  sa una niyang pagsuway   pagsakmit sa kalibutanong bakus, apan anaa gihapon  ang pagtuo  ni  ‘King  Arthur Villanueva nga moabot   ang panahon nga mahimo siyang world champion.

Si Villanueva (27-1, 14KOs) mosuway pagpakita nga aduna siya’y potensiyal nga maghari sa iyang pakigharong ni Mexican knockout artist  Victor ‘Spock’ Mendez (19-2, 15KOs) alang sa bakanteng WBC International super flyweight championship sa event sa “Pinoy Pride 34: Back with a Vengeance” fight card karong gabii didto sa Hoops Dome sa Barangay Gun-ob, Lapu-Lapu City.

Kini ang unang pagbalik og katkat sa ring ni Villanueva human sa kontrobersiyal niyang 10th round technical decision nga kapildihan batok ni Puerto Rican McJoe Arroyo  atol sa ilang IBF title fight  niadtong Hulyo 18 didto sa Texas.

“Naka move-on nako ato. Sakit pero dili ko dapat nga maghuna-huna na ato,” matud pa ni Villanueva nga   mitimbang og 115 lbs. ug mao sab si Mendez atol sa official weigh-in kagahapon didto sa Gaisano Mactan.

Andam si Villanueva nga makig-’rematch’ ni Arroyo, apan nasabtan niya nga dili na interesado ang Puerto Rican nga makigsangka pa niya. Ang kadaugan karon mohatod ni Villanueva sa top 10 ranking sa WBC nga kasamtangang giharian ni Mexican Carlos Cuadras.

“Villanueva is one of our fighters that have a lot of potential to be a world champion and I never doubted his skills,”  matud pa ni ALA Promotions President Michael Aldeguer. “Against Mendez, we will see if he already recovered and if he is ready for another campaign for the world title.”

Sa supporting main event, si Milan ‘El Metodico’ Melindo (32-2, 12KOs)  mangahas og knockout  nga kadaugan batok sa last minute replacement nga si Victor Olivo (9-0, 4KOs) sa Mexico sa ilang 10 round non-title bout.

“Di lang ko magdali ug anhi nako sa mga late rounds suwayan nga makasulod og kusog aron mapatumba siya (Olivo),” segun pa sa garbo sa Cagayan De Oro City.

Sa undercards, ang former amateur standout nga si Kevin Jake ‘KJ’ Cataraja (1-0, 1KO) masuwayan batok ni Faris Nenggo (10-8, 3KOs) sa Indonesia, samtang si AJ ‘Bazooka’ Banal moharong ni Tanzanian Emilio Norfat (24-6, 18KOs) ug si Rocky ‘Road Warrior’ Fuentes (35-8, 20KOs) makigbatok ni Afrizal Tamboresi (11-3, 6KOs) sa Indonesia.