Batang Pinoy finals mosikad na

CEBU, Philippines - Kapin sa 5,000 ka mga atleta uban ang ilang mga coaches ug opisyales ang maghangop karong adlawa aron pagtambong sa engrandeng seremonyas sa pagbukas sa 2015 Philippine National Youth Games-Batang Pinoy Championships diha sa Cebu City Sports Center.

Ang bonggang programa nga gipasalig sa Cebu City Sports Commission nga dili mahikalimtan sa mga dumuduong magsugod sa alas-4  sa  hapon  pinaagi sa  tradisyonal nga parada   sa   mga entrante.

Molingaw sa mga delegado mao ang espesyal nga mga kanta, sayaw ug   exhibition number gikan sa Sinulog idols, mga sakop sa Philippine Taekwondo Association-Cebu Chapter ug ingon man ang nabantog nga Dancesport-Team Cebu City.

Sa higayon nga mapahiluna na ang tanan, ang five-time Sinulog Festival champion Lumad Basakanon maoy mogiya sa mga atleta ngadto sa centerfield atol sa pormal nga pagpaila kanila.

Si Danielle Mae Ozaraga, multi-medalist sa World Center of Performing Arts (WCOPA) ning tuiga didto sa Amerika, maoy mangu sa doxology, samtang mohatag og pambukas nga mensahe mao sila si Cebu City Mayor Michael Rama, Cebu Governor Hilario Davide Jr. ug Philippine Sports Commission chairman Ricardo ‘Richie’ Garcia.

Mangu sa pagdagkot sa urna mao si Mary Joy Tabal, ang rayna sa marathon sa nasud, inabagan sa pipila ka mga batan-ong runners nga iyang sinagop pinaagi sa grassroots program sa CSCC didto sa Barangay Guba.

Si POC president Jose ‘Peping’ Cojuangco, Bacolod City Mayor Monico  Puentevella, ang nagmugna sa Batang Pinoy, si Richard Gomez ug  uban  pang   mga  lokal    ug   probinsiyal nga opisyales ang gikatakda sab nga mosaksi sa maong kalihukan nga tak-upon pinaagi sa maanindot nga fireworks display ug ingon man production number gikan sa  5,000  ka estudyante sa Abellana National School ug uban pang performers.   (BANAT PALARO)