Mayor Radaza motocross mosikad na
CEBU, Philippines - Kapin sa usa ka 100 ka mga riders gikan sa nagkadaiyang dapit sa nasud ang magtige alang sa garbo ug dungog sa tagsa-tagsa nila ka kategoriya gumikan kay mosikad na ang ikaupat nga leg sa 2015 MS Motosuit Motocross Series nga giulohan og “1st Mayor Paz Radaza Motocross Cup” karong adlawa didto sa parking lot sa Gaisano Island Mall sa Barangay Pajo, dakbayan sa Lapu-Lapu.
Si MS Motosuit big boss Lou Ornopia, nga kanhi ‘Sportsman of the Year’ awardee sa Sportswriters Association of Cebu, nagkanayon nga ang mga lig-ong kandidato nga manghawod sa ilang dibisyon mao sila si Jonjon Adlawan, Jubenile Abellar, John Flores, Dondon Yuzon, Paulo Inoc ug si BJ Pepito.
Dili sab hinuon angayan nga kompiyansaan ang bisitang mga riders gikan sa Negros, Bohol, Iloilo, Leyte ug Mindanao nga mokumbati sa maong kulbahinam nga lumba nga gipahigayon agi’g pagtamod sa tinuig nga kapistahan sa Birhen sa Regla, ang mahal nga patrona sa mga Oponganons.
Mga kategoriya nga kumbatihan mao ang mini 60cc ug 85cc, beginners, local enduro, open enduro, executive A, B ug C, novice, intermediate, expert ug premiere pro open. Aduna sa’y underbone competition.
Giorganisar ni Barangay Captain Isabelito Darnayla, ang maong kalihukan gipaluyohan usab sa kagamhanan sa dakbayan sa Lapu-Lapu ubos sa liderato ni Mayor Paz Radaza inabagan sa iyang anak nga si Kongresista Aileen Radaza.
- Latest
