1st Mayor Paz Radaza Motocross Cup gitakda

CEBU, Philippines – Kulbahinam nga lumba sa motor ang masaksihan sa mga Oponganon karong  weekend nunot sa pagpahigayon sa 4th leg sa 2015 MS Motosuit Motocross Series.

Pagaulohan og 1st Mayor Paz Radaza Motocross Cup, ang usa ka adlaw nga karera  moarangkada  karong Sabado didto sa parking lot sa Gaisano Island Mall sa Barangay Pajo, dakbayan sa Lapu-Lapu.

“Akong ipasalig sa tanan nga Oponganon nga makasaksi gyud sila og maanindot ug kulbahinam nga karera tali sa mga ngilngig nga riders sa atong nasud,” matud pa ni MS Motosuit big boss Lou Ornopia.

“Lagmit mao ni ang among katapusang lumba karong tuiga, so amo gyud seguruon nga usa ka eksplosibong aksiyon ang masaksihan sa tanan,” dugang pa ni Ornopia.

Naglangkob sa mga bitoon kansang abilidad angayan nga lantawon mao sila si Jonjon Adlawan, Jubenile Abellar, John Flores, Dondon Yuzon ug Paulo Inoc.

Nagkanayon si Ornopia nga ubay-ubay sab nga tang-an nga mga riders gikan sa Negros, Bohol, Iloilo, Leyte ug uban pang dapit sa Mindanao ang moanhi sa Sugbo aron ipakita sa ilang abilidad sa maong karera.

Mga kategoriya nga banatan mao ang mini 60cc ug 85cc, beginners, local enduro, open enduro, executive A, B  ug  C, novice, intermediate, expert ug  premiere pro open.

Giorganisar ni Barangay Captain Isabelito Darnayla, ang maong kalihukan gipaluyohan sa kagamhanan sa dakbayan sa Lapu-Lapu ubos sa liderato ni Mayor Paz Radaza inabagan ni Kongresista Aileen Radaza.

Kabahin sab kini sa tinuig nga kapistahan sa Lapu-Lapu agi’g pagyukbo sa mahal nilang patrona  --Birhen sa Regla. (BANAT NEWS)