“Magic 12” sa CEPCA grand finals hitsas na

CEBU, Philippines – Kompleto na ang  'Magic 12' nga maoy magtige sa grand finals sa tinuig nga torneyo sa Cebu Executives and Professionals Chess Association (CEPCA) nga gikatakda karong Disyembre 20.

Ang labing uwahing mga qualifiers mao sila si NM Rogelio Enriquez, Jr. ug Martin Kwan sa Group A ug sila si Michael Tinga ug Felix Balbona sa Group B.

Sila si Enriquez ug Kwan mitapos lamang sa ikatulo ug ikaupat nga dapit sa Nobiyembre nga edisyon sa ilang binulan nga eliminasyon niadtong Domingo didto sa Handuraw Cafe, apan ilang giangkon ang katapusang duha ka luna sa finals gumikan kay ang nanghawod nga si Felix Shaun Balbona usa man ka guest player, samtang ang nalandig sa ikaduhang puwesto nga si NM Arnold Cadiz daan na man sab nga nakasud.   Sama sab ang nahitabo sa Group B. Kay mga guest player man nga sila si Laila Nadera ug Rowena Padro ang niharos sa nag-unang duha ka dapit, ang mipahimutang sa nagsunod nga duha ka puwesto maoy misignit sa nahabiling duha ka luna sa championship round.

Nunot niini, sila si Enriquez ug Kwan makigduyog nilang two-time grand champion Jimmy Ty Jr., Rey Flores, Arnold Cadiz, Peterson Sia, Tony Cabibil, Ross Yamyamin, Amado Olea Jr., Zilverstein Torres, Carlo Maraat, ug Jojo Muralla sa gitawag nga 'Battle of Champions' sa Group A.

Samtang sa Group B, sila si Tinga ug Balbona magsagubang og malisud nga hagit batok nilang Regelito Hortelano, Ruel Hortelano, Elmer Odango, Jojo Paredes, Jun Kidlat, CEPCA president Jerry Maratas, Jessa Balbona, Edwin Cablao, Romy Pialan, ug Michael Ventulan. (BANAT NEWS)