Allied nagsolo sa liderato sa triple-a tilt
CEBU, Philippines - Ang Allied team mao na lang ang nagbarog nga koponan nga wala pa’y pilde sa Triple-A Christmas League 2015 basketball tournament.
Kini human midaog batok sa Iesieken, 48-39 sa gubat sa mga wa’y pildeng koponan sa miaging adlaw didto sa Kimwa gym sa Barangay Subangdaku, Mandaue City.
Tulo ka players sa Allied ang miiskor og double figures sa pagpangulo ni Joel Cabahug, kinsa miratsada og 12 puntos.
Kontrolado sa Allied ang tibuok duwa, gani milansang pa sila og 41-24 nga bentaha nga maoy labing daku nilang labaw nga nahimo sa nahabiling 3:10 sa third period.
Si Triple-A presidente Gilbert Lesin ug si Loloh Secad miariya’g 10 puntos matag usa alang sa Allied nga nagbinugtong na sa unang dapit sa standing bitbit ang 3-0 nga baraha.
Si Mai Suson mao sab ang nangu sa Iesieken sa iyang otso puntos, si Orly Navarro adunay siyete puntos, lakip ang duha ka triples.
Sa laing duwa, ang Limasawa mi-rally sa nahabiling 2:40 sa final period ubos sa paggiya nilang Francis Palero ug ni playing coach Redyn Villaronza alang sa ikaduha nilang sunod-sunod nga daog.
Si Palero mitusak og 17 puntos, samtang si Villaronza mitikdol og 16 puntos sa ilang pagpilde sa Triple-A, 63-55. Gawas sa ilang mga puntos, sila si Palero ug Villaronza pareho sab nga milangkat og walo ka rebounds.
Si Geryl Bukiron mao sab ang nangu sa 0-3 nga Triple-A sa iyang 16 puntos, lakip ang duha ka triples.
PUNTOS MATAG USA
Unang duwa:
ALLIED (48) – Cabahug 12, Lesin 10, Secad 10, Budiongan 4, Madrid 4, Recto 3, Mendoza 2, Ocier 2.
IESIEKEN (39) – Suson 8, Navarro 7, Gokotano 6, Montalban 6, Abong 4, Arche 4, Almario 2.
Ikaduhang duwa:
LIMASAWA (63) – Palero 17, Villaronza 16, Gogo 9, G. Armamento 6, Cabucos 5, Ontong 4, Cardoza 2, Sabang 2, Ecot 2.
TRIPLE-A (55) – Bukiron 16, Yu 8, Lurica 7, Monternel 7, Romagos 7, Quijano 4, Nova 4, Gulbing 2, Damolo 2.
- Latest
