Slaughter nagbangis, Gins daog na gyud
CEBU, Philippines – Mibomba og 27 puntos ug milangkat og 19 ka rebounds ang Cebuano center nga si Greg Slaughter aron pangulohan ang Ginebra San Miguel sa usa ka kulbahinam nga 93-92 nga kadaugan batok sa Alaska Aces kagahapon sa kadlawon didto sa Al Wasl Sports Club sa Dubai, UAE.
Sa maong kadaugan ang Ginebra (1-3) misakmit sa labing una nilang daog sa conference ug napugngan ang Alaska (3-1) pagsakmit sa solong liderato sa standing.
Nakita gihapon ang padayung pag-adjust sa Ginebra sa 'triangle offense' sa bag-o nilang coach nga si Tim Cone human pakyas sila pagpadayun sa nindot nilang momentum diin milabaw sila og 56-37 sa halftime sa wala pa sila gukda sa Alaska.
Sa pagpangulo ni Gilas Pilipinas cager Calvin Abueva ang Aces miilog sa labaw sa katapusang 1:40, 89-88, ug gikan didto nahimong sikit ang duwa. Nanimaho na untang daog ang Alaska dihang anaa kanila ang 92-91 nga labaw sa hinapos nga 17 segundos.
Apan usa ka kontrobersyal nga tawag ang sunod nga nahitabo dihang gitawgan og foul sa ref si Vic Manuel ngadto ni Slaughter kinsa mipasud sa duha niya ka free-throws nga mipadaog sa duwa. (BANAT NEWS)
- Latest
