Lakers daog na gyud

CEBU, Philippines – Nidaog na gyud ang Los Angeles Lakers sa unang higayon sud sa lima ka duwa human nila gipilde ang Brooklyn Nets, 104-98 sa NBA kagahapon didto sa Barclays Center sa Brooklyn.

Mihakot og 18 puntos si Kobe Bryant aron pangulohan ang Lakers.    

Ang rookie point guard nga si D’Angelo Russell ug ang Fil-Am guard nga si Jordan Clarkson parehong midugang og 16 puntos   alang sa Lakers, kinsa mipakita sa ilang defensive intensity. 

Ang Nets nabiyaan og 11 puntos sa fourth period, apan nakasikit kini, 95-98    sa katapusang 25.7 segundos sa duwa. 

Sa laing bahin, naputol ang club-record season opening winning streak sa Toronto Raptors nga 5-0 human  mapilde ngadto sa  Orlando Magic sa iskor nga 92-87 didto sa Amway Center sa Orlando, Florida.

  Ang forward nga si Tobias Harris maoy nangu sa Magic sa iyang 20 puntos, si Victor Oladipo  mitampo’g 18 puntos.

Si DeMar DeRozan mao sab ang nangu sa Raptors sa iyang game-high 23 puntos apan misipyat siya sa iyang duha ka free throws nga motabla unta sa duwa sa  25 segundos ang nahibiling oras. 

Sa lain pang resulta sa NBA kagahapon, ang defending champion Golden State Warriors mao na lang nagpabiling team nga wa’y pilde human nila gilubong ang  Denver Nuggets sa iskor, 119-104  alang sa 6-0 nga baraha. 

Si Stephen Curry miburak og 34 puntos sa lain na sab nga dominanteng performance sa Warriors, kinsa miposte’g 40-23 nga labaw sa first quarter.

Mihimo na sab og laing milestone si LeBron James human siya mibahog og 31 puntos ug may 13 ka assists alang sa kadaugan sa Cleveland Cavaliers batok sa Philadelphia Sixers, 80-102.

Si James maoy ika-20 nga player sa kasaysayan sa NBA nga nakahimo na’g 9,000 field goals sa iyang career ug iya kining nahimo pinaagi sa usa ka dunk.  Si James usa sa lima ka aktibong players nga naghupot sa maong record nga naglakip  nilang  Bryant, Kevin Garnett, Tim Duncan ug Dirk Nowitzki.

Midaog sab ang Detroit Pistons batok sa Phoenix Suns, 100-92,  ang Houston Rockets mipilde sa Sacramento Kings, 116-110, gilubong sa Boston Celtics ang Washington Wizards, 118-98. Ang Indiana Pacers nakaipsot   batok sa Miami Heat, 90-87, ang Milwaukee Bucks mipukan sa  New York Knicks, 99-92 ug ang Atlanta Hawks midagit sa New Orleans Pelicans, 121-115. (BANAT NEWS)