Ginebra moiskor og daog

CEBU, Philippines - Dili na maako pa sa Barangay Ginebra San Miguel nga mapahamtanga’g laing kapildihan ug suwayan nila nga makab-ot ang una nilang daog sa PBA All-Filipino Cup batok sa Alaska Aces  karong alas-7 sa gabii  (kaadlawon sa Pilipinas) didto sa Al Wasl Sports Club sa Dubai.

Ang Ginebra giisip dayon nga usa ka lig-ong title contender sa wala pa sugdi ang season tungod   sa pagtapon ni multi-titled coach Tim Cone sa ilang koponan, apan wala damha nga matagak sila sa 0-2 nga standing.

Sa ilang duwa karon, seguradong dili magkuwang sa abiba gikan sa mga OFWs ang Ginebra, apan kinahanglan nila nga doblehon ilang paningkamot tungod kay sangkaon nila ang usa sa mga nag-una sa standing nga Alaska.

Sa katapusan nilang duwa,  giusikan sa  Ginebra ang  ilang 21 nga labaw ug napilde ngadto sa Barako Bull Energy, 79-82.

Sama sa gihapon ang Gin Kings magsalig sa ilang ‘twin tower’ nga sila si Greg Slaughter ug Japeth Aguilar, apan kinahanglan usab sila og suporta gikan nila ni Chris Ellis, LA Tenorio ug rookie Scottie Thompson.

Sa ilang bahin, ang Alaska magsandig  ni ‘The Beast’ Calvin Abueva ug Sugbuanong si Dondon Hontiveros.