Sakripisyo miani og maayong bunga
CEBU, Philippines - Maisip nga usa na sa labing tam-is nga kampiyonato nga nakuha sa Team Visayas ang ilang kalampusan sa bag-o lang natapos nga 7th Milo Little Olympics National Finals didto sa Laguna.
Gawas nga ilang napasibat sa trono ang mortal nilang karibal nga National Capital Region (NCR), nakita usab ang maayong bunga sa mga ‘Bisdaks’ taliwala sa nagkadaiyang kalisdanan nga ilang naagian.
Ang Visayas delegation head nga si Ricky Ballesteros ang labing nalipay ug mapasigarbuhon sa dakung kalampusan sa mga ‘Bisdaks’ ilabi na nga saksi sab siya sa gipakitang sakripisyo sa ilang mga atleta.
“It’s worth the trip. It’s the sweetest victory ever because we’ve made a lot of sacrifices and all of the challenges the world can give us were already given but the resilience of the Visayan athletes really stood out in the competition,” matud pa ni Ballesteros.
Usa sa mga nakapabilib og daku ni Ballesteros mao ang gipakitang kalagsik ug kadasig sa mga Team Visayas athletes, kinsa wala mipakita og kaluya bisan pa mitabok sila og pila ka lawod paingon ngadto sa Laguna.
Ang Team Visayas maoy naghari sa Milo Olympics sa unang edisyon niadtong tuig 2009, gisundan sa duha pa ka sunod-sunod nga kampiyonato, apan sa misunod nga tulo ka tuig, pakyas na sila pag-angkon sa korona human gipakgang sa NCR.
Tungod niini, ang Team Visayas ubos sa liderato ni Ballesteros miporma og usa ka lig-ong koponan nga gilangkuban usab sa mga atleta gikan sa Cebu, Iloilo, Aklan, Bohol ug Dumaguete.
Ang Team Visayas mitapos sa duha ka adlaw nga kompetisyon bitbit ang 577 points gikan sa 13 ka sporting disciplines aron subling maghari sa maong kompetisyon nga gipaluyohan sa Nestle Philippines.(BANAT NEWS)
- Latest
