Hawks midagit na sab og daog
CEBU, Philippines - Ang All-Star guard sa Atlanta Hawks nga si Jeff Teague mipatuasik og 26 puntos uban ang siyam ka assists aron tabangan ang koponan pagpabugnaw sa Miami Heat, 98-92 sa nagpadayon duwa sa National Basketball Association kagahapon didto sa American Airlines Arena sa Miami, Florida.
Sayong nanginit ang Hawks ug maayo sab ang ilang depensa aron mokulit sa ikaupat nilang sunod-sunod nga daog sulod sa lima ka duwa.
Si Al Horford miiskor sab og double figures pinaagi sa iyang 17 puntos uban ang 13 ka rebounds, samtang si Paul Millsap miamot og 12 puntos ug 10 ka rebounds.
Ang sentro sa Heat nga si Hassan Whiteside maoy nangu sa ilang opensa nga mipabuhagay og 23 puntos diin mihimo siya’g 11-of-12 field shooting. Si Whiteside milangkat sab og 14 ka rebounds.
Si Dwyane Wade miduslit og 21 puntos alang sa Heat nga aduna na karo’y 2-2 win-loss record. Hapit maperpek si Wade sa iyang free throws dihang usa lang ang iyang sipyat sa 25 ka tira.
Ang Slovenian guard sa Heat nga si Goran Dragic miamot og 19 puntos, si Chris Bosh miiskor lang og nuybe puntos, apan aduna kini 14 ka rebounds.
Ang 16-2 run sa Hawks pagsugod sa second quarter maoy nakapalabaw kanila og double digits.
Ang Heat miduslit og 10-0 pagsugod sa fourth quarter aron mosikit sa makadiyot gikan sa 14 puntos nga biya ngadto na lang sa kuwatro puntos, 75-79.
Sa laing mga duwa, si Rodney Stuckey miposa’g 23 puntos aron pangulohan ang Indiana Pacers ngadto sa 94-82 nga kadaugan batok sa Detroit Pistons, gilut-an sa Charlotte Hornets ang Chicago Bulls, 130-105, midaog sab ang Orlando Magic batok sa New Orleans Pelicans, 103-94.
Ang Toronto Raptors midaog batok sa Dallas Mavericks, 102-91, gilubong sa Memphis Grizzlies ang Sacramento Kings, 103-89 ug gilubong sab sa Denver Nuggets ang Los Angeles Lakers, 120-109. (BANAT NEWS)
- Latest
