Mayweather gideklara nga 'Champion Emeritus'
CEBU, Philippines – Si Floyd Mayweather Jr. pormal nga gideklara sa World Boxing Council isip ‘Champion Emeritus’ atol sa pagbukas sa tinuig niining WBC Convention didto sa China.
Kini nagpasabot nga bisan dili na siya aktibo isip usa ka boksidor, mayukboan gihapon si Maywearther isip usa ka kampiyon.
Sa wala pa moretiro, si Mayweather nagkupot og upat ka bakus isip WBC ug WBA welterweight ug junior middleweight. Nahimo sab siyang WBO welterweight champion human gipukan si Manny Pacquiao sa kontrobersiyal nga “Fight of the Century” niadtong Mayo 3 didto sa Las Vegas.
Sa mabulokon niyang karera diin iyang gitabla ang 49-0 record ni heavyweight legend Rocky Marciano, ubay-ubay sab nga mga bitoon ang gipagngan og kahayag ni Mayweather. Gawas ni Pacquiao, apil sa mga prominente niyang biktima mao sila si Oscar De La Hoya, Ricky Hatton, Juan Manuel Marquez, Miguel Cotto, Shane Mosley ug Canelo Alvarez.
Ning sayo pa, duna na’y mga hugon-hugon nga si Mayweather moaway pa og balik sunod tuig aron bunyagan ang bag-ong pasilidad nga gitukod sa MGM didto sa Las Vegas. (BANAT NEWS)
- Latest
