Ray Parks moduwa na sa NBA D-League

CEBU, Philippines – Padayun ang dalan ni Fil-American guard Bobby Ray Parks Jr. paingun ngadto sa iyang damgo nga makaduwa sa NBA human siya nakuha isip 25th overall pick sa NBA D-League draft kagahapon.

Si Parks moduwa sa Texas Legends nga mikuha kaniya. Ang Legends usa ka affiliate team sa Dallas Mavericks diin miduwa si Parks sa miaging NBA Summer League.

Ang anak ni PBA Hall of Famer import Bobby Parks maoy nahimong ikaduhang Pinoy nga na-draft sa D-League sunod ni Japeth Aguilar niadtong tuig 2012.

Hinuon daku og posibilidad nga si Parks maoy mahimong labing unang Pinoy nga makaduwa sa D-League human usab si Aguilar daling gitangtang sa line-up sa Sta.Cruz Warriors ug wala man lang nakapakita bisan usa ka duwa.

Sa taho sa NBA.com, si Parks makig-uban usab sa Mavs reserve center ug Indian national nga si Satnam Singh. Di sama ni Parks, si Singh nakuha sa NBA draft isip 52nd overall, apan gipadala una kini sa D-League aron mabaid iyang abilidad.

Atol sa Summer League, si Parks mi-average og 3.0 points ug 1.7 rebounds sa limitadong 10.5 minutes. (BANAT NEWS)