Telstra-Teletech Boomerangs kampiyon sa EVO division
CEBU, Philippines – Midaog ang Telstra-Teletech Boomerangs batok sa Supportsave Dragons, 79-72, sa Game 3 sa ilang best-of-three finals aron sakmiton ang titulo sa EVO division sa 11th CSCC E-League basketball tournament niadtong Sabado didto sa City Sports Club-Cebu gym.
Ang alas sa Telstra nga si Sam Jordan Hermosa miratsada og 32 puntos uban ang 12 ka rebounds, 6 ka steals ug 3 ka assists aron paglabni niini sa dungog isip Finals MVP, samtang si Kenneth Esloyo maoy gipasiduggan nga ‘Coach of the Year’.
Si Jaygard Vios midugang og 11 puntos, lima ka rebounds, duha ka assists ug duha ka steals, samtang si Ryan Paul Abordonado mitampo og 10 puntos, tulo ka rebounds ug tulo sab ka assists sa Telstra, nga milusad og nagbagang opensa sa final half aron pagyabo sa Dragons.
Human biyai og 10 puntos atol sa halftime, 29-39, ang Boomerangs milusad og 30-19 run sa third period aron molabaw og usa ka lugas, 59-58.
Wala na sila molingi pag-usab ang Telstra dayon na ngadto sa pagmartsa niini ngadto sa siyete puntos nga daog.
Si Germaine Jo Guarisma mipatuasik og 23 puntos uban ang 6 ka rebounds, 4 ka assists ug 3 ka steals, samtang si Nino Belande mitali og 14 puntos ug 12 ka rebounds apan nakawang lamang ang ilang paningkamot sa habig sa Supportsave. (BANAT NEWS)
- Latest
