2014 Underdogs midaog dayon sa NABC Sinulog Cup

CEBU, Philippines – Sukwahi sa ilang ngalan, ang Underdogs (Batch 2014) mikulit og 67-54 nga kadaogan batok sa Dos Mil Tres (2003) nga kanhi giila nga Stallions sa ilang debut game sa Division 3  sa miaging weekends sa pagbukas sa University of San Carlos-North Alumni Basketball Conference (NABC) Sinulog Cup basketball tournament didto sa USC North Campus gym sa dan Gen. Maxilom avenue, ning dakbayan.

Dunay upat ka teams ang misalmot sa Sinulog Cup, usa ka special league nga gitumong aron pagtigum sa alumni alang sa ilang Alumni Homecoming and Grand Reunion unya sa Enero 17,2016 ug sila mao ang 1989 Spartans, 1992 Little Rascals, 2008 Fly Boys ug ang 2014 Underdogs.

Sa Division 3, ang laing bag-ong team ang 2008 Fly Boys midemolis sa 2007 Way Bus, 80-63.

Tulo ka teams ang nag-usab og moniker ug logo nga mao ang Dos Mil Siete ngadto na sa Zero Seven Way Bus, 2002 Vikings ngadto sa Legendary Lions ug ang NABC Summer League champion 1985 Androids ngadto sa Legends nga gipangulohan sa usa sa mga USC Warriors' legends nga si Lou Regidor kinsang team midaog batok sa 1984 Knights, 74-56 sa Division 1.

Ang Legendary Lions, mihimo'g 1-1 record sa opening day tungod kay human sa ilang 60-51 nga kadaogan batok sa 1995 Pirates, napilde sila sa usa ka sikit nga duwa batok sa Division 2 champion Dos Mil Uno (2001), 64-67.

Kaniadtong Biyernes, midaog ang 2004 Rebels batok sa 2003 Dos Mil Tres, 64-57 nga gipangulohan ni Lawrence Saballa kinsa mibahug og 15 puntos ug silang Cedric Ian Carubio ug Ian Callet parehong midugang og 12 puntos matag usa.

Ang Dos Mil Tres gipangulohan nilang Antonio Peras ug Jason Tagsip sa ilang 15 ug 11 puntos.

Sa laing bahin, ang Dos Mil Uno gipangulohan nilang  Anton San Juan ug Carlo Campos sa ilang 21 ug 20 puntos, matag usa samtang ang Legendary Lions gipangulohan ni kanhi  USC Warriors center Enrico "Bogs" Llanto sa iyang 26 puntos.

Kaniadtong Sabado, midaog ang 1994 Bulldogs batok sa 1995 Pirates sa iskor, 71-68 sa Division 2 diin si James Lu maoy nganu sa Bulldogs sa iyang 17 puntos ug silang Janssen Juntar ug Sigmundo Cabrera midiga og 12 puntos matag usa. Sa laing duwa, sa Division 2, midaog ang Millenium 2000 batok sa 1999ers, 81-73.

Sa mga sangka kaniadtong Domingo, ang 1986 Mighty Geeks ni NAIA Customs Collector Bingo Matugas midaog batok sa 1987 BROS, 63-54 sa Division 1 diin miposa og 17 puntos si Matugas samtang silang Ramon Tabares ug Noel Demecillo maoy nangu sa BROS sa ilang 14 ug 13 puntos matag usa.

Sa laing sangka sa Division 1, midaog ang 1990 Titans batok sa 1989 Spartans, 59-51 ug midaog sab ang Legends batok sa 1984 Knights. Midaog ang 1998 Sipats batok sa 1996 Chubbies, 71-54 ug midaog sab ang 2004 Rebels batok sa 2005 Chameleons, 76-61 ug gilubong sa Bulldogs ang Dos Mil Uno, 75-60.

Midaog sab ang 2010 Pioneers batok sa 2011 Elevens, 62-56, midaog ang 2004 Rebels batok sa 2005 Chameleons, 76-61, midaog  ang 1994 Bulldogs batok sa USC Faculty, 81-77 ug gipakuratan sa 1999ers ang Dos Mil Uno, 75-60. (BANAT NEWS)