PSL Grand Prix sweep sa HD Lady Spikers
MANILA, Philippines - Sadyang hindi napigilan si American import Ariel Usher.
Humataw ang tubong Oregon, USA ng 29 kills at 6 service aces para tumapos na may conference-high na 36 points sa 25-19, 24-26, 25-23, 25-17 sa panalo ng Cignal sa RC Cola-Air Force Raiders sa 2015 Philippine Superliga (PSL) Grand Prix women’s volleyball tournament kahapon sa Cuneta Astrodome.
Sa likod ni Usher, kinumpleto ng HD Lady Spikers ang pagwalis sa first round ng nasabing inter-club tournament.
“I really don’t mind the numbers. I just did what I have to do and for as long as it could help the team, I am very much willing to do it,” sabi ni Usher, nauna nang umiskor ng 31 points sa five-set win ng Cignal laban sa nagdedepensang Petron noong Oktubre 10 sa Alonte Sports Arena sa Biñan, Laguna.
Nagdagdag naman ang kanyang katambal na si Amanda Anderson ng 9 kills at 5 blocks para sa kanyang 14 points, habang may 10 markers si veteran Michelle Laborte para sa Cignal.
Sa pangunguna ni Puerto Rican import Lynda Morales ay dinala ng Raiders ang laro sa fourth set.
Ngunit muling umatake si Usher sa mahinang backline defense ng Air Force Raiders katuwang sina Anderson at Laborte.
Tumapos si Morales na may 19 points mula sa kanyang 16 kills at nag-ambag naman sina Sara McClinton at skipper Judy Callejo ng tig-14 markers para sa Raiders.
- Latest
