2 tracksters pupunta sa Australia

MANILA, Philippines – Inihayag kahapon ni PATAFA secretary-general Renato Unso na magsasanay sina Mervin Guarte at Edgardo Alejan sa Western Australia Athletic Commission.

“Sa US sana sila magsasanay pero winter ngayon doon. Dumating ang imbitasyon at dahil summer sa Australia kaya doon sila magsasanay. Inaantay na lamang namin ang pondo at aalis na agad sila,” wika ni Unso.

Nakakuha na ang PATAFA ng endorsement sa Philippine Olympic Committee para sa supplemental budget na nagkakahalaga ng P1.8 milyon para sa biyahe ng dalawang runners at ito ay ipinasa na rin sa Philippine Sports Commission para pondohan.

Si Guarte ay nanalo dalawang silver medal sa 800m at 1,500m events ng nakaraang Singapore SEA Games, habang si Alejan ay kumuha ng bronze medal sa 400m run.

Bago ito ay nabigyan na ng suporta ang paghahandang ginagawa ni 2016 Rio Olympic qualifier Fil-Am Eric Cray, habang si pole vaulter Ernest John Obiena ay babalik muli sa Formia, Italy para magsanay sa hangaring mapataas ang kasalukuyang 5.50m national record.