Lancers nakapugos OG Game-5

CEBU, Philippines - Nakaginhawa pa ang University of the Visayas Green Lancers human sa ilang  60-52 nga kadaugan batok sa University of San Carlos Warriors, sa Game-4 sa ilang “best-of-five” finals series sa 15th Cebu Schools Athletic Foundation, Inc. (CESAFI) basketball kagabii didto sa Cebu Coliseum.

Bisan  og  wala  kaayo sila mangigo sa sayong bahin sa duwa, nakasustenir lang    gihapon ang Lancers ug didto sila modangop sa ilang import nga si Steve Cedrick Akomo aron modaog ug ingon man makapugos og Game-5   unya sa Martes sa alas-6 sa gabii.

Ang Warriors, kinsa kinahanglan lang unta nga modaog kagabii aron maangkon ang labing una nilang collegiate title   sa 57 ka tuig, nangigo sa  outside shooting  diin milabaw  sila og 11 puntos sa uwahing bahin sa first period, 28-17. Apan ang Green Lancers milusad og 13-0 run pagsugod sa period aron mailog ang labaw, 33-30 sa three pointer ni Francisco Arong.

Nasakmit  pagbalik   sa Warriors ang labaw, 44-41 paingon sa final period, apan ang Green Lancers mihimo og laing 11-0 run alang sa  ilang otso puntos nga labaw, 52-44 sa nahabiling 6:38 sa duwa.

Ang import sa Warriors nga si Shooster Olago napugngan lang ngadto sa   siyete puntos nga maoy iyang career-low.

Si Akomo maoy napiling best player of the  game human miiskor og 13 puntos ug 13 sab ka rebounds uban ang duha ka assists.

Ang topscorer sa mga lokal sa Lancers mao si Arong sa iyang 11 puntos, gisundan ni Leonard Santillan nga adunay 10 puntos.

Pakyas ang Warriors  sa usa ka maayo untang higayon aron langkaton ang korona tungod kay wala kaayo makahuygo si June Kent Manzo,  kinsa igo lang mihimo'g siyete puntos.

Sila si Victor Rabat ug Charles Pepito mihimo’g 11 puntos matag usa aron pangulohan ang Warriors. 

Puntos matag usa

UV (60) – Akomo 13, Arong 11, Santillan 10, Cabanero 9, Manzo 7, Codilla 5, Mendoza 3,

Segumpan 2.

USC (52) – Rabat 11, Pepito 11, Olago 7, Lim 5, Magat 5, Laguyo 4, Suarez 3, Tagapan 2, Ortega 2,

McAloney 2.   (BANAT NEWS)