Coast Guard, Navy babangon sa V-League
Laro Ngayon
(The Arena, San Juan City)
12:45 p.m. Coast Guard vs Navy
MANILA, Philippines – Babangon ang Coast Guard Lady Dolphins at Navy Lady Sailors sa pagkatalo sa unang laro sa kanilang pagkikita sa Shakey’s V-League Season 12 Reinforced Conference ngayon sa The Arena sa San Juan City.
Ang mananalo sa larong magsisimula sa ganap na alas-12:45 ng hapon ay magtatabla sa kanilang karta matapos ang dalawang laro para kapitan pa ang ikaapat na puwesto sa ligang inorganisa ng Sports Vision katuwang ang Shakey’s at handog ng PLDT Home Ultera.
Natalo ang Lady Dolphins sa PLDT Ultra Fast Lady Hitters, 10-25, 11-25, 20-25 habang ang Lady Sailor ay dumapa sa UP Lady Maroons, 25-19, 23-25, 23-25, 23-25.
Magkasukat ang lakas ng magkabilang koponan kaya’t makakaasa na magiging mahigpitan ang kanilang tagisan.
Sina Pau Soriano, Hezzymie Acuna at Lilet Mabbayad ang magdadala sa Navy habang ang Coast Guard ay aasa sa galing nina Rossan Fajardo, Sandra delos Santos at Samantha Dawson.
Single-round robin ang elimination round at ang mangungunang apat sa anim na kasali ang aabante sa semifinals.
Magkakasama sa liderato ang PLDT, UP at Army Lady Troopers sa 1-0 karta at babasagin ang kanilang pagkakatabla sa pagpapatuloy ng liga bukas.
- Latest
