Megabond 5-0 na sa A+EBA tourney
CEBU, Philippines – Ang Megabond mibuntog sa Davies Paints, 83-78 aron magpabiling wa’y pilde sa Architects+Engineers Basketball Association’s 1st Corporate Cup didto sa University of San Carlos-main gym.
Si Michael Cinco mipabuto og 51 puntos alang sa Davies Paints, apan wala siya makapiog sa hiniusang puwersa nilang Romulo Anino, Loreniel Tequin ug Malvin Malicdem sa Megabond.
Si Anino miratsada og 27 puntos, si Tequin mikamada’g 24 puntos, samtang si Malicdem milansang og 23 puntos a Megabond, nga milusad og mainit nga 26-15 rally sa katapusang hunat sa duwa aron pagpakaging sa Davies Paints.
Gumikan niini, ang Megabond nagsolo gihapon sa liderato bitbit ang baraha nga 5-0, samtang ang Davies Paints midailos ngadto sa 2-3 uban ang Dorma ug Fenestram.
Sa laing mga duwa, ang CMI milupig sa Fenestram sa overtime, 71-67 aron magpabilin sa ikaduhang dapit bitbit ang 4-1 win-loss record, samtang ang Dorma mipatilaw sa Phoenix sa ikalima niining sunod-sunod nga kapildihan, 85-55. (BANAT NEWS)
- Latest
