Belande misalida sa Dragons, Hermosa bida sa Boomerangs
CEBU, Philippines – Si Nino Belande miratsada og 20 puntos ug milangkat og 18 ka rebounds aron pag-aswat sa Supportsave CEBU, Philippines – Dragons ngadto sa 86-61 nga pagkastigo sa Teletech Titans sa 11th CSCC E-League men's basketball tournament niadtong Sabado diha sa City Sports Club-Cebu gym.
Midugang si Germaine Jo Guarisma og 19 puntos uban ang walo ka assists ug pito ka steals alang sa Supportsave nga pabiling nagsolo sa liderato sa Evo League bitbit ang 9-1 win-loss record. Hayag na ang kadaogan alang sa Dragons human kini miposte og 18 puntos nga labaw sa halftime.
Wala na makabangon pa sukad niadto ang Teletech aron pagtilaw sa ikasiyam niining pilde nga gi-atbangan og duha lamang ka daog. Nangu sa pilderong koponan mao si Jonas Concepcion nga dunay 26 puntos, tulo ka rebounds ug tulo sab ka assists.
Samtang si Sam Jordan Hermosa mipabuto og season-high 52 puntos nga iyang gipa-amanan og 12 ka rebounds ug upat ka assists aron pagtuboy sa Telstra-Teletech Boomerangs ngadto sa 96-83 nga kalampusan batok sa 24/7 Cagers, 96-83. Gumikan niini, nagpabilin sa ikaduhang puwesto ang Telstra dala ang baraha nga 8-2.
Si Jaygard Vios mitampo og 21 puntos ug upat ka steals sa Telstra, nga migamit og 21-10 rally sa endgame aron pagpakaging sa Cagers.
Si Ralph Belarmino miposa og 41 puntos ug 14 ka rebounds apan nakawang ang iyang paningkamot kay ang 24/7 mingsukarap ngadto sa 4-6.
Sa laing mga duwa, si Aerl Genebraldo mitali og 30 puntos ug 14 ka rebounds aron pangulohan ang 73-67 nga kadaogan sa Calltek Trojans batok sa Kyocera Frontiers, samtang si Justin Jay de la Cruz mikadlit og 17 puntos ug 10 ka rebounds alang sa Author Solutions, Inc. Hardbacks, nga mingmakmak sa The Results Companies Spartans, 75-63. (BANAT NEWS)
- Latest
