Lakers milansang sa ikaduha nilang daog sa laba
CEBU, Philippines - Ang duha ka krusyal nga tira ni Raymundo Carvajal sa himalatyong segundos sa fourth quarter nakatabang sa pagpadaog sa Lakers sa kulbahinam nilang duwa batok sa MS Motosuit, 84-77 sa second conference sa LABA President’s Cup 2015 basketball tournament niadtong Lunes didto sa Barangay Banilad Sports Center, Mandaue City.
Gipangulohan sab niya ang kadaugan human mihakot og 24 puntos. Miabag sab si Aldrin Gonzaga, kinsa mikandos og 18 puntos, samtang si Marcial Marturillas mihabwa’g 14 puntos alang sa Lakers, kinsa nahulga human makatabla ang MS Motosuit, 76-all sa nahabiling 1:24 sa final period. Apan si Carvajal mipasud og tulo ka sunod-sunod nga basket aron bingaton ang ilang labaw, 82-76 sa nahabiling 43 segundos sa duwa ug sukad niadto wala na molingi pa ang Lakers.
Sa maong kadaugan, ang Lakers temporaryo karong nag-una sa standing sa ilang 2-0 nga baraha.
Ang MS Motosuit ni playing coach Lou Ornopia gipangulohan ni Estremos sa iyang 16 puntos, samtang laing upat niya ka teammates ang miiskor sab og double figures.
Sa pasiunang duwa, ang Lolypop/Rostata miiskor sab og daog batok sa Avengers, 89-81.
Si Rene Monsanto miantog og 21 puntos aron pangulohan ang Rostata, samtang si Arnold Pestaño mao sab ang nangu sa Avengers.
Ang Rostata nagbitbit na’g 1-1 nga baraha, samtang ang Avengers adunay 0-2 record ning maong liga nga gipadagan ni league commissioner Geryl Bukiron ubos sa bendisyon sa ilang presidente nga si Gilbert Sebandal.
Ang mga duwa aktibo sab nga giabagan nilang Ramil Baclay ug Lloyd Chavez ug ingon man nilang Chang Tejero, Gener Estrera ug Eduard Escorial nga maoy mi-officiate sa maong mga duwa. (BANAT NEWS)
- Latest
