Kyocera mipakurat sa Telstra sa E-League
CEBU, Philippines – Ang Kyocera Frontiers mipakugang sa Telstra-Teletech Boomerangs, 87-86, sa makapaisa'g balhibo nilang sangka sa 11th CSCC E-League men's basketball tournament niadtong Sabado didto sa City Sports Club-Cebu gym.
Si Ariel Ramonito Edera mipabuto og 33 puntos uban ang 11 ka rebounds, samtang si Junrey Cabarrubias midugang og 21 puntos, walo ka rebounds, lima ka steals ug upat ka assists alang sa Kyocera.
Miposa og 18 puntos si Ryan Paul Abordonado uban ang walo ka rebounds, samtang lain pang upat niya ka mga kaubanan ang maayo sab og duwa apan nakawang lamang ang ilang paningkamot sa kampo sa Telstra.
Sa laing duwa ubos sa Evo League, si Ralph Belarmino mipabuto og 47 puntos nga iyang gipa-amanan og 15 ka rebounds aron pag-agak sa 24/7 Cagers ngadto sa 93-85 nga kadaogan batok sa Teletech Titans.
Si Jan Michael Cipres mi-abag ni Belarmino bitbit ang 10 puntos, walo ka rebounds ug tulo ka assists.
Way nahimo si Jonas Concepion alang sa Teletech bisan pa og miratsada siya og 40 puntos, siyam ka assists ug four steals, ingon man si Jervis Pino Sildura nga mitipig og 20 puntos ug unom ka blocks.
Sa bugtong duwa sa Elite Classic, ang Convergys Converters nagsandig sa balanse niining ataki aron pagmakmak sa Wipro Tigers, 86-66.
Si Lourenz Limpangog mitali og 15 puntos, samtang sila si Sherwin Resilla ug Franz Dione Dysam nagkumboya og 24 puntos alang sa Converters, nga wala na molingi pa human miposte og 24-15 nga bintaha human sa unang kuwarter. (BANAT NEWS)
- Latest
