Gilas nakabawi

CEBU, Philippines - Nakabawi ang Gilas Pilipinas gikan sa ilang kapildihan ug ilang gipahimungtan ang Hong Kong nga gilubong nila og 51 puntos, 101-50 sa ikaduhang adlaw sa 2015 FIBA Asia Championship kagahapon didto sa CSWC gym sa Hunan, China.

Human sa ilang sakit ug makauuwaw nga 73-75 nga kapildihan sa mga kamot sa Palestine niadtong Miyerkules, ang Gilas Pilipinas grabeng nagbangis diin wala gyud nila hatagi og kahigayonan ang Hong Kong nga makasikit human sa ilang 12-0  sa first period.

Dili sama sa Gilas, midaog ang Hong Kong sa ilang opener niadtong Miyerkules batok Kuwait sa Group A, apan wala sila kaarte batok sa mga Pinoy nga midominar kanila sa opensa ug depensa tibuok duwa.

Sila si Andray Blatche ug Jayson Castro nagtambayayong og pabuto og mga puntos sa first half aron moposte og 51-22 nga bentaha.  Ang Gilas nga wala matagbaw, mipaburot og maayo ang labaw sa Gilas dihang nagkumbinar og mga puntos silang Dondon Hontiveros, Terrence Romeo ug Ranidel De Ocampo aron ilubong og 50 puntos ang Hong Kong sa iskor nga 88-38 nga nakapahayag sa ilang kadaugan.

Si Castro maoy leading scorer sa Gilas sa iyang 21 puntos, lima ka rebounds ug duha ka assists, samtang si Blatche adunay 17 puntos ug si Hontiveros mihipos og 14 puntos.

Nakita ang makatuok nga depensa sa Gilas dihang duha lang ka mga players sa Hong Kong ang nakahimo og double figures nga sila si Siu Wing Chan, kinsa mitusak og   13 puntos ug naturalized player nga si Duncan Reid nga mipugnit og 11 puntos.

Ang Gilas mosuway pagkulit sa ikaduha nilang daog batok sa Kuwait sa alas-4:45 sa hapon alang sa katapusan nilang duwa sa preliminary round.  (BANAT PALARO)