Gilas nadisgrasya

CEBU, Philippines - Kapildihan nga lisud dawaton ang nahiaguman sa Gilas Pilipinas dihang gipakuratan sila sa Palestine, kinsa mihimo og dakung upset, 75-73, kagahapon sa opener sa FIBA Asia Championship didto sa CSWDC Dayun gym sa Changsha, China.

Daghan ang nagtuo nga sayon ra nga idispatsar sa Gilas ang mga Palestinian nga bag-o pa lang nakaduwa sa FIBA Asia, apan gipakuratan nila ang national team dihang  mihimo sila og fourth quarter rally aron mailog ang daog.

Sa pagpangulo ni Andray Blatche, ang Gilas milansang og 45-33 nga labaw sa first half,  apan nakan-an kini sa Palestine ngadto na lang sa kuwatro puntos sa dayong tapos sa third period.

Nahimong suliran sa depensa sa national team ang mga gunner sa Palestine nga sila si Sani Sakakini ug Jamal Abu Shamala nga maoy mipas-an sa opensiba sa ilang koponan.

Nangigo hinuon sila si Terrence Romeo ug JC Intal aron hatagan ang Gilas og 71-62 nga labaw sa katapusang tres minutos sa duwa, apan mihimo og 10-0 rally ang Palestine.

Ang Palestine naglabaw og uno punto, 72-71 sa nahibiling 1:34 sa duwa, apan human sa tira ni Blatche, dali nga nakapasulod si Sakakini sa iyang lay-up sa katapusang 15 segundos nga maoy miselyado sa kadaugan.

Si Blatche maoy nangulo sa Pilipinas sa iyang 21 puntos ug 12 ka rebounds, samtang sila si Romeo ug Jayson Castro nagkumboya’g 21 puntos.

Si Abu Shamala adunay 26 puntos alang sa Palestine, samtang si Sakakini miiskor og 22 puntos.

Karong alas-9 sa buntag, ang Gilas Pilipinas moharong  sa Hong Kong nga midaog usab sa ilang duwa batok sa Kuwait kagahapon. (BANAT NEWS)