3rd hunat Sugbu triathlon karon sa Argao
CEBU, Philippines - Gatosan ka mga triathletes ang motaak og balik sa Argao habagatang bahin sa Sugbo alang sa ikatulong edisyon sa Hunat Sugbu Triathlon karong hapon sugod didto sa unity plaza sa maong lungsod.
Ang makutas nga kompetisyon naglangkob og sprint ug standard distance. Gawas sa relay, may team event sab nga seguradong makapadugang sa kabibo sa torneyo.
Sa standard distance, si Kristiane Glendale Lim, kanhi pambato sa Parklane nga anaa na karon sa Alaska Tri-Aspire, maoy paborito nga makampiyon. Lain pang mga notadong entrante mao sila si Xterra pro Joseph Miller, Welmar Saavedra ug Jeffrey Codino sa Omega Pro ug Jorry Icong sa Repro Optima.
Si Cianyl Gonzalez maoy gipaboran nga modominar sa women’s division.
Samtang sa sprint race, sila si national junior pool members Aaliyah Mataragnon, Issa Priagula, Shaia Uy ug Ralph So maoy mga sayong paborito nga mosakmit sa titulo.
Sa relay, dul-an sa 20 ka mga koponan ang magtigi. Kini naglangkob sa Parklane Tri Team, Floijess, Infinitea, Metafit, One Hit Wonder, Ply Team, Sagidlay, Tri-Liloan, Tri MAC, TriSensei, Univille ug Xtream White.
Sa dili pa sugdan ang karera sa ala 1:00 sa hapon, ang tanang partisipante ug uban pang interesado giimbita alang sa usa ka dragonboat clinic ug Zumba party karong buntag didto sa Argao Royal Psalms. (BANAT NEWS)
- Latest
