CEPCA anniversary chessfest banatan na
CEBU, Philippines - Kapin sa 150 ka magduduwa og ahedres gikan sa nagkadaiyang dapit sa Sugbo ug ingon man sa mga silingan niining probinsiya ang magdangop aron magpalabwanay sa ilang abilidad ug kahait sa paminsar gumikan kay ang gikahinaman nga Cebu Executives and Professionals Chess Association (CEPCA) Silver Anniversary Open Tournament mosikad na karong adlawa diha sa bakanting lugar duol sa Slimmers World sa second level sa SM City-Cebu.
Sa dili pa sugdan ang kumbati sa ala-1 sa hapon, usa ka pormal nga seremonyas sa pagbukas ang ipahigayon nga pagatambongan sa mga opisyales sa CEPCA nga gipangulohan sa presidente niining si Engr. Jerry Maratas.
Si Cebu City Mayor Mike Rama giimbita sab aron maoy mangu sa ceremonial move ingon man si kanhi mayor Alvin Garcia, nga usa ka honorary member sa CEPCA.
“Kay amo man giselebrar ang ika-25 nga anibersaryo sa CEPCA, amo gyud gitrabaho nga mahimo kining espesyal nga okasyon pinaagi sa pagpahigayon og pipila ka mga activities sama niining open tournament nga usa sa among mga major event,” matud pa ni Maratas.
Ang duha ka adlaw nga kompetisyon motanyag og sobra sa P50,000 nga ganting salapi sa mga mananaog.
Ang rehistrasyon nagkantidad og P150 sa ladies ug kiddies (14 anyos paubos), P200 sa Cepcans ug seniors ug P300 sa mga regular players. Ang mga organizers modawat og on-site registration sugod sa alas -10:30 karong buntag.
- Latest
