Magis Eagles dili gyud pabangbang
CEBU, Philippines – Ang topseed nga Sacred Heart School-Ateneo de Cebu Magis Eagles misugod sa ilang kampanya sa semifinal uban ang 69-45 nga kadaugan batok sa University of the Visayas Baby Lancers sa 15th Cebu Schools Athletic Foundation, Inc. (CESAFI) kagahapon didto sa Cebu Coliseum.
Preparado kaayo ang Magis Eagles halos sa tanang departamento sa duwa.
Gawas sa balanseng ataki nga gipangulohan nilang Jed Colonia ug Andrew Velasco, ang mga batos ni coach Roel Rasmo mipatuman sab og lig-ong depensa hinungdan nga wala kaayo makahuygo ang leading scorer sa UV nga si Raul ‘Jancork’ Cabahug, kinsa nalimitahan lang ngadto sa 15 puntos.
Gawas lang sa 6-0 start sa UV, ang SHS-Ateneo wala na molingi pa human molabaw, 12-11 sa basket ni Alex Visser. Giinat sa Magis Eagles ang labaw ngadto sa 17 puntos sa halftime, 38-21.
Si Jed Colonia maoy nahimong best player sa maong duwa pinaagi sa iyang 11 puntos uban sa upat ka rebounds, unom ka steals ug usa ka assist, apan si Andrew Velasco maoy nangu sa opensa sa Magis Eagles sa iyang 13 puntos.
Si Cabahug mao lang ang bugtong player sa UV nga mihimo’g double figures sa iyang 15 puntos nga maoy iyang labing ubos nga iskor karon nga season. (BANAT NEWS)
- Latest
