Baby Lancers sa semis

CEBU, Philippines – Naangkon sa University of the Visayas Baby Lancers ang ika-upat ug kataposang luna sa semifinals sa juniors division human ilang gitiwasan ang University of San Jose Recoletos Baby Jaguars sa ilang do-or-die game kagahapon sa iskor, 77-58 aron mahan-ay ang semifinal ugmang adlawa sa nagpadayon nga 15th season sa Cebu Schools Athletic Foundation Inc. (CESAFI) basketball tournament didto sa Cebu Coliseum.

Busa, ang Baby Lancers maoy nakig-uban sa laing tulo ka mga qualifiers nga naglakip sa top two seeds Sacred Heart School-Ateneo de Cebu Magis Eagles (8-0), University of San Carlos Baby Warriors (6-2) kinsa parehong mihimo'g bye atol sa quarterfinal round ug third seed University of Cebu Junior Webmasters (5-3) kinsa nagkinahanglan pang mokulit og 87-76 nga kadaogan aron tagakon ang sixth-ranked University of Southern Philippines Foundation Baby Panthers kaniadtong Septiyembre 8 didto gihapon sa Cebu Coliseum.

Ang juniors semifinals sugdan ugma diin magsangka ang Magis Eagles batok sa Baby Lancers diin mopailawon pa ang upat ka teams sa single round robin series. Sa una nilang pagbagat sa elimination round, midaog ang Magis Eagles batok sa Baby Lancers sa iskor, 73-64 kaniadtong Agosto 15.

Ang Baby Lancers kinsa mi-sweep sa twice-to-beat advantage nga gihuptan sa Baby Jaguars, gipangulohan ni Raul "Jancork" Cabahug kinsa mibahug og 22 puntos ug wala mapiog sa ilawom pinaagi sa iyang 17 ka rebounds gawas pa gyud sa iyang tulo ka assists, duha ka blocks ug usa ka steal aron mahimo na sab nga best player of the ballgame.

Gipakita ni Cabahug  ang mas gagmay niyang karibal og usa ka clinic diin igo lang silang mokapyot sa iyang batan-on nga braso ug siya maoy nangu sa iyang team halos sa tanang departamento.

Sa matang sa gipakitang duwa sa Baby Lancers diin daghan kanila ang nag-igo sa gawas ug nagpakita nga determinado kaayong modaog, walay gikasugakod ang Baby Jaguars tungod kay susama sa ilang 68-42 nga kapildehan niadtong Septiyembre 8 misamot kabati ang ilang pagsugod kay nabiyaan sila human sa first period, 27- 5 nga mas labaw pa sa 14-4 score sa unang duwa sa quarterfinal.

Mao sa'y naglabaw sa halftime ang Baby Lancers sa iskor, 42-18 tungod kay igo lang sila nakahimo'g 6 for 37 field goals sa first half ug may 2 for 25 shooting sa first period.

Natawagan og unsportsmanlike foul si Joshua Renz Ortiz sa maong duwa ug ingon man gitawagan sab og technical foul ang sakop sa coaching  staff nga si Agripino "Jun" Noel sa uwahing bahin sa second period tungod sa sigeng reklamo sa tawag sa referee ug nakighinabi siya kang CESAFI commissioner Felix O. Tiukinhoy, Jr. didto sa coliseum lobby aron mangayo og katin-awan apan wala hinooy nasaug kung unsay ilang nasabotan.

Si Ortiz maoy nangu sa Baby Jaguars sa iyang 13 points samtang parehong may 10 puntos matag usa silang John Kirk Gonzaga ug Geo Ibero.

Si Cabahug sa laing bahin, giabagan sa iyang mga kauban sama kanilang Thiey Paraldo ug Marvin Rey Oche kinsa miamot og 11 puntos matag usa samtang may 10 puntos si Beirn Anthony Laurente aron tabangan nga molampos sa ilang semifinal campaign ang Baby Lancers kinsa wapa mahitabong natagak sa 15 ka tuig sa CESAFI.

Sa seniors' match, magbagat pag-usab ang University of San Carlos Warriors ug ang importless nga Cebu Institute of Technology-University Wildcats kinsa ila nang gipilde sa first round of elimination sa iskor, 83-75 kaniadtong Agosto 18.

Kataposan nga nagduwa ang Warriors niadto pang Septiyembre 6 dihang ilang gilubong ang USPF Panthers, 100-72.

Sugod ugmang adlawa, sagunson na sab ang duwa sa Warriors kinsa nakasinati og taas-taas nga pahuway ug ang nahibilin nilang lig-on nga kontrahon mao na lang ang  strong contender UV Green Lancers on September 20, usa ka semana sa dili pa ang tinuig nga CESAFI All-Star Games unya sa Septiyembre 27 didto gihapon sa Cebu Coliseum.

Puntos matag usa:

UV (Jrs.) 77 – Cabahug 22, Paraldo 11, Oche 11, Laurente 10, Ro. Alforque 8, Amistoso 6, Ra. Alforque 3, Membrano 2, Yerro 2, Padilla 2.

USJR (Jrs.) 58 – Ortiz 13, Gonzaga 10, Ibero 10, Ando 8, Enriquez 8, Leonora 4, Teleron 3, Dado 2. Halftime: 42-18. (BANAT NEWS)